Çfarë po premtojnë partitë politike shqiptare të Bujanocit në fushatën parazgjedhore?

Partia që ka udhëhequr në mandatin 2012 – 2016 komunën e Bujanocit, Partia Demorkatike e Nagip Arifit në tubimin e mbajtur në Bilaç tha se ata kanë realizuar disa projekte në këtë fshat në infrastrukturë, në mbështetje të bizneseve dhe bujqësisë.

Kryetari i PD-së, Nagip Arifi premtoi në Bilaç ndërtimin e fushës sportive.

Koalicioni PVD-UDSH që ka bartës të listës Shaip Kamberin në këtë fushatë po premton bashkimin dhe faktorizimin e shqiptarëve në komunën e Bujanocit, sepse sipas tyre “pushteti aktual ka përbuzur shqiptarët”.

Kandidati për kryetar të komunës, Shaip Kamberi në tubimin e mbajtur në Bujanoc kritikoi pushtetin aktual që nuk ka mbajtur premtimet, duke thënë se “premtimi për 2.000 vende pune nga pushteti aktual ishte mashtrim”.

Ai tha se PVD-UDSH do t’i kthej dinjitetin shqiptarëve dhe do të parandalojë ikjen e të rinjve nga komuna e Bujanocit.

Edhe në këto zgjedhje fushata parazgjedhore e Lëvizjes për Progres Demokratik të Jonuz Musliut po karakterizohet me tone patriotike.  

Kryetari i LPD-së, Jonuz Musliu, në tubimin e mbajtur në Breznicë u shpreh kështu “ne kemi mision, ne kemi amanetin, këta dëshmorë që kanë rënë këtu kanë pasur vetëm një qëllim, qëllimi i tyre është bashkimi kombëtar”.

LPD në Breznicë kritikoi edhe pushtetin lokal për mos investime, edhe pse dihet që ka qenë pjesë e këtij pushteti prej vitit 2013.

Ndërkaq, Partia republikane, e cila për herë të parë po merr pjesë në zgjedhje lokale në komunën e Bujanocit në tubimet e mbajtura në Malësi të Bujanocit kritikoi pushtetin aktual që nuk ka realizuar asnjë projekt në këto fshatra.

Ramiz Rashiti, kandidat për këshilltar nga lista e republikanëve premtoi se “në kuvendin e ardhshëm të Bujanocit zëri i malësorëve do të jetë më i fuqishëm dhe më vendimmarrës”./Titulli.com/