Lokale
Arifi: S’ka më si në 2013-tën, duhet plan dhe vizion (foto)
Në sallën e vogël të shtëpisë së kulturës në Bujanoc sot është mbajtur një takim me qëllim aftësimin e udhëheqësve të ndërmarrjeve dhe institucioneve publike për të përfituar fonde nga Bashkimi Evropian.
Në këtë mbledhje që u hap nga kryetari i komunës së Bujanocit Nagip Arifit fillimisht të pranishmit u informuan rreth realizimit të buxhetit për vitin e kaluar dhe planifikimet për vitin 2014.
Mirëpo, që në fillim Arifi ishte i prerë, nuk ka më udhëheqje të ndërmarrjeve dhe institucioneve sipas mënyrës së vitit 2013-të. Ai kërkoi që këtë vit metoda e punës në ndërmarrje dhe shkolla të ndryshojë rrënjësisht, me një vizion të qartë dhe jo pa plan afatgjatë, raporton Titulli.
Përveç kësaj, në takim me drejtorët e shkollave, të ndërmarrjeve publike, me Drejtoratin për Financa e zyrën për Zhvillim Ekonomik Lokal, u prezantua edhe mënyra e aplikimit të përfaqësuesve të këtyre ndërmarrjeve për të thithur fondet nga BE.
Fazile Azemoviq, koordinatore në Zyrën për Zhvillim Ekonomik Lokal në mënyrë të detajuar sqaroi mënyrën e aplikimit në këto fonde.
Sipas Azemoviq, institucionet e interesuara së pari duhet të paraqesin personelin për ta trajnuar në mënyrë që të përpilojnë projektet, dhe sipas saj, afati i fundit për paraqitje është më 27 janar të këtij viti, derisa trajnimi është falas.
Trajnimi i kandidatëve të paraqitur do të zgjasë rreth tetë muaj duke filluar që nga 1 shkurti.
Zyra për Zhvillim Ekonomik Lokal, përveç sqarimeve që sot paraqiti përmes video projektorit, tha se është e hapur për çdo sqarim shtesë edhe në zyrën e saj në ndërtesën e administratës komunale./Titulli.com/
Mund ti tregoni shoqërisë për këtë artikull!
