Lokale
Zagreb: Komuna Bujanocit fton investitorët
Filloi punimet konferenca rajonale e Zagrebit, Komuna e Bujanocit prezanton potencialet ekonomike.
Në kryeqytetin e Kroacisë, Zagreb, ka nisur sot punimet konferenca rajonale me temën “ Ambienti i volitshëm për investime në Evropën Jug-lindore”.
Punimet e konferencës në mënyrë solemne i ka hapur Presidenti kroat, Ivo Josipoviq, derisa me fjalime përshëndetëse janë paraqitur edhe ministrat e ekonomisë nga Kroacia e Bosnja e Hercegovina.
Në konferencë po marrin pjesë 18 komuna nga Kroacia, Bosnja, Serbia dhe Maqedonia.
Komuna e Bujanocit është në mesin e katër komunave nga Serbia e cila pati nderin të jetë pjesëmarrëse e konferencës.
Përveç pjesëmarrjes në punime të konferencës, kryetari i Komunës së Bujanocit, Nagip Arifi, ka zhvilluar një sërë takimesh me zyrtarë të ndryshëm nga shtetet e rajonit.
Posaçërisht, Arifi ka shpalosur përparësitë e investimeve në komunën e Bujanocit, duke potencuar daljen në korridorin 10-të si dhe trekëndëshin ndërkufitar me disa shtete të Evropës Jug-lindore.
Në takimin e Zagrebit për herë të parë janë certifikuar nga NALED-i disa komuna për kushte të volitshme për investime, derisa komuna e Bujanocit pritet të ricertifikohet deri në fund të muajit.
Përveç takimeve për dhe rreth konferencës, delegacioni i Komunës së Bujanocit ka zhvilluar edhe disa takime tjera me shoqatat e shqiptarëve në Kroaci.
Veçmas duhet veçuar takimin me ambasadorin e Republikës së Shqipërisë në Zagreb, Pëllumb Qazimi dh atë të Kosovës, Valdet Sadiku.
Takimi me këta diplomat kaloi në një atmosferë vëllazërore, ndërsa u prekën temat që i përkasin rajonit të Evropës Jug-lindore. Me theks të veçantë u bisedua pozita e shqiptarëve në rajon ku u theksua domosdoshmëria e integrimeve evropiane.
Delegacioni i kryesuar nga kryetari Arifi ka takuar edhe Gëzim Rexhepin, kryetar i Këshillit Kombëtar Shqiptar për Bashkinë e Zagrebit, ku është biseduar për pozitën e shqiptarëve në Kroaci dhe lidhjet e tyre me vendlindjen.
Ndërkohë , sonte në mbrëmje do të zhvillohet një takim me kryetarin e Forumit të Intelektualëve Shqiptar në Kroaci, Muhamet Morinën.
Në delegacionin e komunës së Bujanocit përveç kryetarit Nagip Arifi, në vizitën zyrtare në Zagreb po qëndrojnë edhe shefi i kabinetit, Arbër Pajaziti dhe koordinatorët e zyrës për Zhvillim Ekonomik Lokal, Fazila Azemoviq dhe Nexhat Behluli.
Pas përfundimit të vizitës në Kroaci, është planifikuar që kryetari Arifi të takoj në Beograd shefin e misionit të BE-së në Serbi, ambasadorin Vincent Degert./Titulli.com/
Mund ti tregoni shoqërisë për këtë artikull!
