Lokale
Salla ishte e vogël për ligjëratën e Dr. Zekerija Bajramit (video)
Salla në shtëpinë e kulturës në Bujanoc ishte e vogël për të pranuar të gjithë të interesuarit për të marrë pjesë në ligjëratën fetare të Dr. Zekerija Bajramit nga Shkupi
Mysafiri nga kryeqyteti i Maqedonisë Dr. Zekerija Bajrami mori pjesë në manifestimin me rastin e përkujtimit të “Israsë dhe Miraxhit” të organizuar nga Bashkësia Islame për Preshevë, Bujanoc dhe Medvegjë (BIPBM), Këshilli në Bujanoc.
Në këtë organizim të BIPBM-së i cili u mbajt të enjten nuk u realizuan këndimet e karakterit fetar në respekt të viktimave dhe shpalljes së tre ditë zie nga Qeveria e Serbisë.
Në fjalën përshëndetëse për të pranishmit kryetari i BIPMB-së Nexhmedin Saqipi falënderoi edhe teologun e mirënjohur për ardhjen e tij në Bujanoc, derisa ky i fundit ishte i entuziazmuar me pjesëmarrjen kaq të madhe në këtë organizim, raporton Titulli.
Dr. Zekerija Bajrami gjatë ligjëratës së tij foli për jetën e profetit Muhamed dhe shokëve të tij duke dhënë shembuj konkret nga jeta e profetit të fundit të dërguar nga Krijuesi.
Ai me këtë rast kërkoi aktivizimin e të rinjve, pasi siç tha ata janë lokomotiva që do të vazhdojnë rrugëtimin e Islamit, ashtu siç ishte ndihmuar edhe profeti Muhamed nga rinia e atëhershme, duke marrë shembullin e 11 vjeçarit që i kishte lëshuar shtëpinë profetit për takimet e tij me shokët.
Në manifestimin fetar të pranishëm ishin një numër i madhe i nxënësve të shkollave, profesorëve, hoxhallarëve, qytetarëve si dhe drejtues të institucioneve lokale./Titulli.com/
Mund ti tregoni shoqërisë për këtë artikull!
