Lokale
Përmbyllet manifestimi “Ditët e Komandant Lleshit” (foto dhe video)
(i plotësuar)
Me intonimin e himnit kombëtar filloi mbrëmja e fundit e manifestimit “Ditët e Komandant Lleshit”
Në këtë manifestim qendrorë u prezantuan tre filmat: “Rruga”, “Hekurishtja” si dhe “Te Liqeni”.
Interesimi për natën finale të Festivalit për filmat e metrazhit të shkurt “Shkurt, Shqip për Vajën” ishte i konsiderueshëm përderisa u ndanë edhe mirënjohje për mysafirët Avni Dalipi aktor dhe producent, regjisorët e njohur shqiptar Burim Haliti, Robert Bacaj, Kastriot Saqipi, Osman Demiri si dhe Gazmend Kajtazi kryeredaktor i Telegrafit.
Kryetari i OVL-së në Bujanoc Edmond Isufi elaboroi rreth jetës dhe veprës së Ridvan Qazimit-Komandant Lleshit, ndërsa, regjisori Kastriot Saqipi ngriti në këmbë të gjithë sallën për të duartrokitur ish aktorin “Vajën”.
Manifestimi “Ditët e Komandant Lleshit” u përmbyllë me një këngë folklorike të kënduar nga Shoqëria Kulturoro-artistike “Shqiponjat” nga Karadaku i Preshevës./Titulli.com/
**************************************************************************************************************************************************************************
Në fshatin Tërnoc të komunës së Bujanocit sot një numër i konsiderueshëm i qytetarëve i shoqëruar edhe nga mysafirët nga Kosova kanë qëndruar në muzeun e Ridvan Qazimit-Komandant Lleshit, si dhe kanë bërë homazhe tek varri i dëshmorit.
Hapja e muzeut u bë sipas agjendës së paraparë në kuadër të manifestimit tradicional “Ditët e Komandant Lleshit”, përderisa qytetarëve tërnocas si dhe atyre nga vendbanimet tjera, iu bashkuan edhe regjisorët nga Kosova të cilët u pritën nga përfaqësuesit institucional dhe kryetari i komunës së Bujanocit Nagip Arifi.
Rreth historikut të muzeut si dhe sendeve me vlerë të Komandant Lleshit që gjenden në te, foli kryetari i Bashkësisë Lokale të Tërnocit Agim Haliti, i cili njëherit me këtë rast njoftoi të pranishmit me familjarët e Ridvan Qazimit si dhe prindërit e dëshmorëve të tjerë dhe ish pjesëtarëve të UÇPMB-së që ishin prezent në këtë ngjarje përkujtimore, raporton Titulli.
Me përfundimin e vizitës në muze, të pranishmit vazhduan rrugën së bashku me prindin e dëshmorit Haxhi Hisen Qazimin për tek varri i djalit të tij, ku edhe qëndron lapidari i dëshmorit.
Gjatë homazheve të bëra fjalën e mori kryetari i Organizatës së Veteranëve të Luftës (OVL) së UÇPMB-së në Bujanoc, Edmond Isufi, i cili për nder të veprës madhështore të Komandant Lleshit i luti të pranishmit për një minutë heshtje.
Më pas pasuan edhe vendosjet e kurorave me lule nga shoqata e regjisorëve, komuna e Bujanocit, OVL në Bujanoc, mërgimtarët e fshatit Tërnoc, OVL nga Presheva, Familja e Komandant Lleshit, nga Këshilli organizativ “Ditët e Komandant Lleshit” dhe Partia për Veprim Demokratik.
Përndryshe manifestimi qendror “Ditët e Komandant Lleshit” do të mbahet sot në shtëpinë e kulturës në Bujanoc me fillim në orën 17:30 ku do të bëhet edhe ndarja e mirënjohjeve për filmat e metrazhit të shkurt (Shkurt, Shqip për Vajën), ndërsa në orën 19:00 me një program të radhës përmbyllet manifestimi tradicional “Ditët e Komandant Lleshit”. /Titulli.com/
Mund ti tregoni shoqërisë për këtë artikull!
