Pse po bie qeverisja e Preshevës?
Sonte në mesnatë pritet që të bie pushteti komunal i Preshevës me kryetar Shqiprim Arifin.
Njoftimin për Tëvë1 e bëri këshilltari komunal i Preshevës, Shpëtim Haliti, i cili tha se një gjë e tillë ndodh pasi për tre muaj rresht nuk ka arritur të mbahet asnjë mbledhje e rregullt e kuvendit komunal, në mungesë të kuorumit.
“Kryetari zgjidhet nga kuvendi jo nga populli. Nëse 3 muaj nuk mbahet kuvendi zgjedhor i rregullt, pushteti bie. Sot në mëngjes ishim të ftuar në seancë të rregullt, komplet grupi i partisë për veprim demokratik ishim aty, filluam me vonesë, në orën 10:00 filluam me vonesa, në ora 11:00 u takuan shefat e grupeve të këshilltarëve ku kryetari i Kuvendit, Smail Salihu, i njofton se nuk kemi shumicë sepse dy këshilltarët serbë të Listës Serbe të Aleksandër Vuçiqit kanë vendosur të mos marrin pjesë në seancë dhe në orën 24:00 bie ky pushtet”, u shpreh Haliti.
Haliti tha se beson që rënia e pushtetit ka ndodh me dëshirë të Shqiprim Arifit.
“Kjo prishje besoj të ketë ndodhë me vetdëshirë të Shqiprim Arifit pasi 70 kryetarë kanë dhënë dorëheqje, ky nuk ka pasur guximin të jap dorëheqje dhe e ka zgjedhë këtë formë që kinse s’po vinë këshilltarët serbë dhe po prishet pushteti”, u shpreh Haliti.
“Ne nuk e kemi obligim t’ia bëjmë kuorumin pushtetit, i cili ka marrëdhëniet më të këqija ndonjëherë Kosovë-Preshevë. Edhe para 3 muajve ne nuk kemi qenë në seancë, ka qenë Lista Serbe, e kanë bërë shumicën me Listën Serbe. Por politika e kryetarit të Preshevës i ka shkuar gjithmonë përshtati Aleksandër Vuçiqit dhe ia ka bërë kuorumin”, tha Haliti.
Ndërsa, i pyetur nëse Shqiprim Arifi u detyrua nga Vuçiqi për rënien e pushtetit në këtë komunë, Haliti tha se Arifi nuk ka nevojë të detyrohet nga ai, vetëm sipas Halitit, duhet të përshtatet.
“Shqiprim Arifi nuk besoj që duhet të detyrohet ndaj Vuçiqit, vetëm duhet t’i përshtatet për tu bërë zgjedhjet e jashtëzakonshëm siç është duke u bërë në shumicën e komunave në Serbi, pavarësisht që ende nuk janë shpallë”, tha Haliti
Haliti tha se sipas ligjeve të Serbisë, pas rënies së pushtetit në një komunë, qeveria zgjedh qeverisjen prej kryetarit dhe katër anëtarëve të organeve të përkohshme.
