Përkujtohet veprimtari nga Malësia e Bujanocit, Njazi Kadriu

Me rastin e përvjetorit të vdekjes, Kryesia e Lëvizjes “Vatra”, dhe kryesia e  Shoqatës se  ish-të burgosurve politik bënë  homazhe tek varri i veprimtarit  të çështjes kombëtare Njazi Kadriu, në Gjilan.

“Njazi Kadriu për shtatë vite radhazi vuajti kazamateve serbe, qelitë e burgjeve të Vranjës e Nishit jo rrallë ishin ngopur me gjakun e tij nga torturat çnjerëzore të uniformës çetnike serbe, e megjithatë torturat nuk e thyen”, thuhet në kumtesën e lëshuar sot nga Lëvizja “Vatra” me seli në Gjilan.

Mëtej kjo Lëvizje shkruan se Kadriu doli edhe më i fortë shpirtërisht për të vazhduar rrugën që tashmë shokët e tij e kishin çuar edhe më përpara, duke u ndodhur edhe UÇK e UÇPMB, Njaziu qe nga ata veprimtarë që u përfshi shpirtërisht në vorbullën e kryengritjes.

“Me parime shumë të shëndosha njerëzore e shoqërore, komunikoi edhe pas luftës deri sa një ditë nga një sëmundje e rëndë i mbylli sytë për të ikur përgjithnjë”, thekson “Vatra”.

Gjate homazheve të bërë në varrin e të ndjerit e evokuan kujtime për Njaziun nga  Kryetari i të Burgosurve Politik në Gjilan Sabit Rexhepi, Ramadan Dermaku, Avni Veliu nga Lëvizja Vatra e Hysen Kadriu nga Familja.

Kush ishte Njazi Kadriu?

Njazi Kadriu u lind në fshatin Ramabuçë të Malësisë së Bujanocit më 28 prill të vitit 1956 në një familje liridashëse.

Jeta e vështirë në fshat, natyra e ashpër, bisedat në oda e ndeja të ndryshme që bëheshin, sidomos gjatë dimrave të gjatë e të ashpër të Malësisë, edukata në frymën atdhetare nga babai Shabani dhe nga xhaxhai Sahiti, Njaziun e kalitën para kohe dhe brumosën me dashuri ndaj atdheut./Titulli.com/