NUNS: Censurë në Komunë të Bujanocit ndaj portalit Titulli.com

NUNS vlerëson se ky ndalim paraqet formën më të vrazhdë të censurimit dhe sulm mbi lirinë e informimit.

Siç ka mësuar NUNS, udhëheqësia e vetëqeverisjes lokale më 20 mars ka urdhëruar që në serverin e ndërtesës së Komunës së Bujanocit të bllokohet qasja në portalin Titulli.com.

“Titulli.com është portali më i vizituar në gjuhë shqipe në të cilin më së shumti thirren mediat shqiptare dhe serbe, individë si dhe institucione nga Jugu i Serbisë”, thuhet në kumtesën e lëshuar sot nga Shoqata e Pavarur e Gazetarëve të Serbisë.

Duhet theksuar se portali informativ Titulli i censuruar nga udhëheqësia e Komunës së Bujanocit me bllokim, më pas të “dënuara” përkohësisht edhe mediat tjera online me pretekst se të gjitha adresat i kemi bllokuar, për të mbuluar këtë veprimi të ulët, po vazhdon edhe sot, por sërish me censurim vetëm të adresës www.titulli.com.

Edhe pse kryeshefi i administratës së Komunës së Bujanocit, Nasim Rexhepi, të premten në një prononcim për Titullin kishte thënë se nga dita e hënë (sot) do të zhbllokohen portalet informative. Ky premtim deri në momentin e raportimit nuk po gjen zbatim të plot në praktikë.

Informacioni më i ri që vie nga godina e administratës vërteton edhe njëherë vazhdimin e shkeljes mbi të drejtën e informimit të qytetarëve, duke bllokuar në mënyrë selektive vetëm portalin informativ Titulli, ndërsa portalet tjera, përfshirë edhe rrjetin social Facebook janë kthyer sërish në kompjuterët e punëtorëve të kësaj administrate.

Titulli edhe njëherë nënvizon se duke e ditur që godina dhe administrata ku ajo është e vendosur nuk është pronë private, por publike, diskriminime të tilla do të raportohen tek organet më të larta vendore e ndërkombëtare. /Titulli.com/