Liderët takojnë Hazirin, premtohet hapja e Zyrës për Luginën
Kryetari i Komunës së Gjilanit, Lutfi Haziri, ka pritur të enjten në një takim përfaqësuesit e Luginës së Preshevës, Riza Halimin - deputet dhe lider i PVD-së, Shaip Kamberin- deputet dhe ish-kryetar i komunës së Bujanocit, si dhe Galip Beqirin–kryetarin e Këshillit Kombëtar Shqiptar.
Kryetari Haziri ka thënë se Gjilani është gati për ta hapur Zyrën për Preshevë, Medvegjë dhe Bujanoc, e cila do të merret ekskluzivisht me zgjidhjen e problemeve civile dhe problemet tjera politike që i kanë qytetarët e Kosovës Lindore. Nga ana e tyre, tre përfaqësuesit e Luginës, kanë falënderuar kryetarin Haziri për kontributin e tij për avancimin e të drejtave të shqiptarëve të asaj pjese, që padrejtësisht po vazhdon të jetë nën ombrellën e një shteti tjetër. Ata po ashtu, falënderuan Hazirin për angazhimin drejt hapjes së Zyrës për shqiptarët e Luginës së Preshevës, duke thënë se kjo përkujdesje institucionale nga ana e Komunës së Gjilanit do të jetë në favor të shqiptarëve për zgjidhjen e problemeve civile dhe problemet tjera politike. /Titulli.com/
