Lokale
Kuvendi emëron anëtarët e rinj të KZK-së si dhe të Këshillit të shkollës “Ali Bektashi”
Në seancën e parë për këtë vit Kuvendi Komunal i Komunës së Bujanocit ka arritur që të aprovojë të dhjetë pikat e rendit të ditës.
Në këtë mbledhje të radhës Kuvendi ka bërë shkarkimin e përbërjes së vjetër të Komisionit Zgjedhor Komunal (KZK) duke emëruar anëtarët e rinj, derisa në këtë pikë edhe pati diskutime mes këshilltarëve të opozitës dhe atyre që drejtojnë me komunën e Bujanocit.
Për këshilltarët e Partisë për Veprim Demokratik (PVD) ishte e papranueshme një ndërhyrje e tillë në KZK kur dihet se për 16 ditë do të ketë zgjedhje Parlamentare në të cilat merr pjesë edhe PVD.
Tensionet u ngritën në pikën e fundit kur edhe u bë shkarkimi dhe më pas emërimi i anëtarëve të rinj në Këshillin e shkollës fillore “Ali Bektashi” në Nesalcë.
Me këtë nuk ishin dakord si shefi i grupit të PVD-së Ragmi Mustafa njashtu edhe këshilltari tjetër i këtij subjekti opozitar, Enver Ramadani.
Atë u shprehën me këtë rast se po futet politika në këtë shkollë, përderisa thanë se deri më tani udhëheqësia e këtij institucioni arsimor ka bërë një punë të mirë.
Nga ana tjetër, kryetari i Kuvendit Komunal Jonuz Musliu theksoi se me ndryshimet në këtë Këshillë duke emëruar anëtarë të rinj, po freskojmë këtë Këshillë i cili për disa vite me radhë është i njëjti.
Ai, për më tepër theksoi se nuk ka asgjë me drejtorin e deritanishëm, duke nënvizuar se jashtë politikës atë e ka edhe shumë mik të mirë, raporton Titulli.
Në këtë pikë të rendit të ditës, kur edhe u bë shkarkimi dhe emërimi i anëtarëve të Këshillit të shkollës “Ali Bektashi” këshilltarët opozitar lëshuan seancën.
Përveç këtyre pikave të nxehta, në mbledhjen e parë për këtë vit të Kuvendit Komunal u aprovuan edhe pika të tjera si plotësimi i Statutit të komunës së Bujanocit, propozim aktvendimi mbi ndryshimin dhe plotësimin e Aktvendimit mbi emërimin e anëtarëve të Këshillit drejtues të Qendrës për Punë Sociale, si dhe të Këshillit drejtues të Barnatores së qytetit në Bujanoc.
Në seancë u raportua edhe për punën e Këshillit komunal të Komunës së Bujanocit për vitin 2013-të, si dhe i Shtabit për situata të Jashtëzakonshme.
Ky Shtab para këshilltarëve komunal paraqiti edhe programin e punës për vitin 2014-të./Titulli.com/
Mund ti tregoni shoqërisë për këtë artikull!
