Lokale
Kërkohet zyrë diplomatike në Luginë
Zyrtari ndërlidhës i Kosovës në Serbi, Lulzim Peci i cili këtë javë nisë punën zyrtare në Beograd, ka thënë se zyra e tij nuk do të merret me Luginën e Preshevës.
Përfaqësuesit e shqiptarëve të Luginës së Preshevës kërkojnë nga Qeveria dhe Kuvendi i Kosovës që ta hap një zyre diplomatike në Bujanoc apo në Preshevë, sepse hapja e dy zyrave për Luginën në Gjilan e Prishtinë, sipas tyre, konsiderohet e pakuptimtë.
Ish-përfaqësuesi politik i UÇPMB-së dhe aktualisht kryetari i Kuvendit të Bujanocit, Jonuz Musliu ka thënë se është e domosdoshme hapja e një zyre nga Qeveria e Kosovës në Luginë për të qenë prezent vetë qeveria në këtë rajon.
“Kudo që e hap një zyre Qeveria e Kosovës apo kudo që ngrihet flamuri i Kosovës është shumë domethënëse, sepse burimi dhe problemi është në Luginë. Jo të raportohet në drejtim të Kosovës, por Kosova do të jetë drejtpërdrejt pjesë e problemeve të Luginës”, ka thënë Musliu për mediat e Prishtinës.
Musliu është shprehur pesimist nëse Kosova do të mund ta hapë një zyrë në Luginë.
“Është koha e fundit që të ketë diçka konkrete dhe të implementohet rezoluta e Kuvendit të Kosovës e jo të lihet vetëm për fushatë të subjekteve politike në Kosovë. Nëse këta e kanë bërë vetëm për fushatë, besoj që do t’i ndëshkojë populli”, ka thënë Musliu.
Ai po ashtu kërkon nga institucionet e Kosovës që implementimi i marrëveshjes të bëhet në reciprocitet me të drejtat e shqiptarëve në Luginën e Preshevës.
“Kërkesa jonë është që të ketë reciprocitet që nga fillimi i implementimit të marrëveshjes çkado që u jepet serbëve në veri, të njëjtën gjë duhet ta marrin shqiptarët në Luginë edhe atë njëkohësisht, e assesi t’u jepet atyre dhe të pritet për ne”, ka thënë Musliu.
Sipas tij, nëse serbëve në veri u jepet gjyqi i apelit, të njëjtën gjë duhet ta marrin edhe shqiptarët në Luginë, Qeveria e Kosovës duhet ta bëjë këtë me kushtëzime.
Ndërkaq zyrtari ndërlidhës i Kosovës në Serbi, Lulzim Peci i cili këtët javë nisë punën zyrtare në Beograd, ka thënë se zyra e tij do të merret me normalizim të marrëdhënieve me Serbinë, por nuk ka precizuar nëse do të jetë edhe “avokat” i të drejtave të shqiptarëve në Serbi.
“Zyra e Kosovës në Beograd mandat të vetin e ka normalizimin e marrëdhënieve mes dy vendeve. Ndërkaq sa i përket zyrës në Luginë, kjo është çështje e politikanëve të të dyja vendeve”, ka thënë shkurt Peci.
Mund ti tregoni shoqërisë për këtë artikull!
