Bujanoc: Nadije Beqiri, gruaja e parë shqiptare në Parlamentin e Serbisë
Me rastin e 8 Marsit një urim i veçantë për gruan e parë shqiptare në Parlamentin e Serbisë.
Në rajonin e Luginës së Preshevës, nuk njeh historia e saj, të ketë pasur në Kuvendin republikan, një grua deputete siç ishte Nadije Beqiri, nga Lluçani i Komunës së Bujanocit.
Zonja Nadije u zgjodh përfaqësuese e popullit në Parlamentin e Serbisë, në legjislaturën e vitit 2020-2022, për të shënuar histori si gruaja e parë shqiptare në Kuvendin Popullor të Serbisë.
Fitorja e zonjës Nadije Beqiri, ishte një surprizë e këndshme për skenën politike shqiptare në Luginë të Preshevës, e cila u manifestua me një varg urimesh e përgëzimesh nga më të ndryshmet, duke shprehur krenarinë për ngritjen afirmative të gruas shqiptare në politikë, si vlerë e çmuar evropiane.
Ndonëse nuk ishte një mandat i plotë, deputetja u shqua edhe për diskutimet e saja pragmatike, duke shtruar në mënyrë institucionale problemet me të cilat ballafaqohen shqiptarët në këtë rajon.
Zhvillimi ekonomik, integrimi i shqiptarëve në institucione shtetërore, barazia dhe drejtësia në punësim, ishin disa nga çështjet kryesore, të cilat i parashtroi ish deputetja Nadije, duke ngjallur reagime dhe debate përbrenda seancave parlamentare.
Simboli i gruas në një shoqëri të diskriminuar nga shteti është tejet i vështirë për t’u përfaqësuar, e sidomos në një parlament i cili bie ligje shpesh në dëm të pakicave kombëtare ne Serbi.
Zonja Nadije, është e lindur më vitin 1961 dhe aktualisht është e angazhuar si ekonomiste në Shkollën Fillore “Naim Frashëri” në Bujanoc, si dhe shquhet për angazhimet e saj në jetën politike, arsimore e kulturore.
Shkruar nga Driton Hyseni Shoqëria Civile “Perspektiva”- Bujanoc
