Arrihet marrëveshja për njohjen reciproke të diplomave Kosovë-Serbi, shqiptarët e Luginës të kthehen?

Në kuadër të dialogut Prishtinë-Beograd sot është diskutuar për njohjen reciproke të diplomave. Në takim, ku morën pjesë delegacionet e të dyja shteteve, u bë e ditur se BE-ja ka përcaktuar mekanizmin ndërkombëtar si certifikues të diplomave të nivelit universitar të lëshuar nga të dy vendet.

Ky mekanizëm përbëhet nga ekspertë të fushës akademike të BE-së dhe diplomat e certifikuara do të mbajnë logon e Bashkimi Evropian. Pas certifikimit nga BE-ja, të dyja shtetet kanë detyrim t`i njohin dhe certifikojnë diplomat universitare të njëra-tjetrës.

Ministrja për dialog Edita Tahiri, vlerësoi se kjo marrëveshje është shumë e dobishme, sidomos për shqiptarët e Luginës së Preshevës të cilët kryesisht kanë kryer studimet në Kosovë. Ajo shprehu bindjen se tani të diplomuarit, shqiptarët e Luginës së Preshevës, duhet ta shfrytëzojnë këtë mundësi që të kthehen të jetojnë dhe punojnë në trevat e tyre. BE ka përcaktuar mekanizmin ndërkombëtar si certifikues të diplomave të nivelit universitar të lëshuar nga të dy shtetet.