Lokale
Arifi: Shqipëria nuk ka bërë sa duhet për Luginën
Qeveria e Shqipërisë edhe pse ka obligim kushtetues ndaj shqiptarëve që jetojnë jashtë kufijve të shtetit shqiptarë, deri më sot ka bërë shumë pak
I pari i Komunës së Bujanocit Nagip Arifi gjatë qëndrimit në TV Spektri tha se Shqipëria nuk ka bërë sa duhet për shqiptarët e Luginës.
“Kur ka mund Qeveria e Shqipërisë të ndajë rreth 400 mijë euro për Graçanicën, pse nuk mund të bëjë një ndihmë për maternitetin e Preshevës apo për ndërtimin e një shkolle këtu në Komunën e Bujanocit, ndërtimin e ndonjë ambulance në fshatrat shqiptare apo asfaltimin e rrugëve”, ka thënë mes tjerash kryetari i kësaj komune, citon Titulli.
Arifi mbetet me shpresë se në të ardhmen gjërat do të ndryshojnë, ndërsa për angazhimin e Kosovës, sidomos me aprovimin e Rezolutës për Luginën, mendon se ky shtet do të bëjë më shumë për shqiptarët e kësaj ane.
“Tash Kosova ka mundësi. Përveç që ka aprovuar Rezolutën besoj se shumë shpejt do të stabilizohet gjendja në veri dhe në këtë drejtim Qeveria e Kosovës ka mundësi më shumë t’i ndihmojë shqiptarë e Bujanocit, Preshevës dhe Medvegjës pasi fizikisht jemi afër”, është shprehur kryetari i Komunës së Bujanocit.
Kuvendi i Kosovës për herë të parë në historinë e saj ka aprovuar një Rezolutë për Luginën. Miratimi i Rezolutës për më shumë të drejta të shqiptarëve është pritur mirëpritur si nga spektri politik, njashtu edhe nga popullata shqiptare e tri komunave të Luginës./Titulli.com/
Mund ti tregoni shoqërisë për këtë artikull!
