Vuçiq: S’kemi asgjë nga Liqeni i Ujmanit, aty vetëm mund të lahemi
Presidenti serb, Aleksandar Vuçiq tha se ai bisedoi më së shumti me homologun e tij francez, Emmanuel Macron për Kosovën.
Ai duke iu referuar Kosovës deklaroi se është e nevojshme që pala tjetër të kuptojë se “dialogu nuk është një pus dëshirash”.
“Unë nuk shoh asgjë që mund të na sjellë më pranë një dialogu serioz. Ne jemi gjithmonë të gatshëm për bisedime, por çdo marrëveshje kërkon dy palë, por për momentin nuk shoh një tjetër” tha ai.
Sipas tij, Beogradi do të presë nëse Prishtina do të përmbushë të paktën një pjesë të marrëveshjes së Uashingtonit.
Kreu i shtetit serb tha mes tjerash se pas vendosjes së marrëdhënieve diplomatike midis Izraelit dhe Kosovës, asnjë vend mysliman nuk do të dëshirojë të njohë pavarësinë e Kosovës.
Vuçiq deklaroi se Serbia tani do të presë për të parë nëse Prishtina do të respektojë pjesën e saj të marrëveshjes së Washingtonit dhe nëse do të lejojë ndërtimin e një hekurudhe nga Prishtina në Merdare.
“I gjithë mashtrimi është se ata duan të ndërtojnë një hekurudhë nëpër Mitrovicë, Leposaviq dhe Zveçan me Kraljevën dhe Rashkën në mënyrë që të marrin hekurudhat serbe në veri të Kosovës. Ne po kërkonim një rrugë dhe një hekurudhë nga Prishtina në Merdare, ata nuk janë të interesuar për këtë, sepse nuk ka asnjë hekurudhë serbe që ata mund të marrin “, tha Vuçiq.
“Ne ishim duke kërkuar rrugën dhe hekurudhën Prishtinë-Merdare, por ata nuk janë të interesuar, sepse nuk ka asnjë hekurudhë serbe që ata mund të marrin. Një çështje tjetër është Liqeni i Ujmanit përveç që të lahemi në Ujman, nuk shoh asgjë tjetër”, raporton B92, transmeton Klan Kosova.
“Unë pashë që (zyrtari i Departamentit të Shtetit të SHBA Matthew) Palmer këmbënguli për t’i dhënë fund marrëveshjes midis Izraelit dhe Kosovës dhe unë e di se ai ishte kundër marrëveshjes së Washingtonit. Tani do të shohim nëse doni të ndani burimet e energjisë të Liqenit të Ujmanit,” tha ai.
