Lokale
Thyhet zyra në KF Tërnoci, vidhet kompjuteri (foto)
Zyrtarët e klubit më të suksesshëm të Luginës kanë njoftuar se persona të panjohur mbrëmë kanë hyrë me dhunë në ambientet e klubit futbollistik Tërnoci.
Mëngjesin e sotëm, klubin nga fshati Tërnoc i komunës së Bujanocit e ka gjetur të demoluar, me një kompjuter të vjedhur si dhe dëme tjera të shkaktuara në orenditë e saj.
Drejtori i KF Tërnocit, Enis Salihu i ka thënë Titullit se gjatë ditës së djeshme gjithçka ka qenë në rregull, derisa në mëngjesin e sotëm kanë gjetur zyrën e thyer dhe pa kompjuterin i cili ishte dhuruar nga komuna e Bujanocit.
“Në mëngjesin e martës zyra është gjet e thyer ndërsa policia ka bërë vëzhgimin e vendit të ngjarjes. Persona të panjohur kanë vjedhë një kompjuter dhe kanë demoluar ambientet e zyrës duke thyer edhe orenditë. Dëmi mund të kalojë shifrën e 400 eurove”, theksoi për mediumin tonë Salihu.
Kompjuteri i cili ishte ndarë nga komuna e Bujanocit, përkatësisht donacion nga Shqipëria, këtij klubi i ka shërbyer shumë, sidomos për shkuarjen e të dhënave pas secilës ndeshje që zhvillonte KF Tërnoci.
Hajnat në ambientet e zyrës, sipas drejtorit Salihu, kanë hyrë përmes dritares, duke e thyer atë.
Policia me ekspertët e saj kanë bërë fotografimin dhe marrjen e gjurmëve dhe është në kërkim të personave që kanë kryer këtë vepër penale./Titulli.com/
Mund ti tregoni shoqërisë për këtë artikull!
