Serbia ka ashpërsuar masat për të parandaluar përhapjen e koronavirusit të ri dhe autoritetet kanë vendosur orë policore nga ora 8 e mbrëmjes deri në 5 të mëngjesit, transmeton Titulli.com.

“Në Serbi, është e ndaluar lëvizja e të moshuarve gjatë ditës, ndërsa në orët e natës janë të ndaluar të gjithë qytetarët, përveç autoriteteve kompetente përgjegjëse të grupit të punës dhe qytetarët që punojnë në ndërrimin e tretë, tha presidenti i Serbisë, Aleksandar Vuçiq.

"Që nga nesër në mëngjes në orën 10, janë absolutisht të ndaluara lëvizjet e njerëzve mbi 65 vjeç në zona urbane, dhe në qytete më të vogla, zona rurale, është e ndaluar të lëvizësh nëse keni mi 70 vjeç. Ata duhet të qëndrojnë në shtëpitë e tyre dhe unë u kërkoj pleqve tanë ta kuptojnë këtë", tha Vuçiq.

Presidenti serb theksoi se të gjitha vendkalimet kufitare, qendrat e migrantëve dhe spitalet do të jenë nën kontrollin e Forcave të Armatosura serbe, të cilat, siç theksoi Vuçiq, do të jenë të armatosur.

Vuçiq tha gjithashtu se dënimet për ata që nuk respektojnë izolimin "do të jenë shumë, shumë të ashpra".