Reagon Shoqëria Civile: Pushteti lokal uzurpon administratën
Shoqëria Civile “Perspektiva”, reagon ndaj shërbimit të Administratës komunale të Bujanocit, e cila, siç thotë shoqëria, “në mënyrë arbitrare është refuzuar kërkesa e saj për verifikimin e deklaratave” për zgjedhjet e Këshillave të pakicave kombëtare në Serbi, të cilat do të mbahen, më 26 tetor, të këtij viti.
“Kryeshefi i Administratës komunale, Nasim Rexhepi, i dirigjuar nga eprori i tij, hedh poshtë kërkesën e Shoqëria Civile “Perspektiva”, me arsyetimin se, të hënën e 6 tetorit, po të njëjtën ditë partia në pushtet e Nagip Arifit, paska caktuar tre punkte për grumbullimin e deklaratave dhe verifikimin e tyre, nga punëtorët e administratës!”, kështu nisë reagimi i “Perspektivës”.
Kjo organizatë më tej shton, “Në qoftë se janë vetëm tre punëtorë administrativ, që merren me verifikimin e deklaratave, nuk do të thotë se që të tre, të caktohen për partitë pushtetare, e asnjë për shoqatën joqeveritare!”
Për shoqërinë civile ky veprim i Administratës komunale në Bujanoc, është një shembull i keq i një pushteti, i cili nuk zgjedh mjete e metoda për tu ngjitur shkallëve të Këshillit të ardhshëm nacional!, trameton Titulli.
“Me një fjalë e “kënaqi”, qeverisjen lokale e tashti dëshiron ta “skapit” edhe Këshillin Nacional!”, shkruhet në reagim.
Pavarësisht nga pengesa “anticivilizuese” e pushtetit lokal në Bujanoc, dhe pengesave të tjera të natyrës “shantazuese” Shoqëria Civile “Perspektiva” thotë se do të gjej rrugë tjera për të grumbulluar deklaratat e mbështetësve të Listës për “Ardhmërinë e shqiptarëve në Serbi”.
Shoqëria Civile “Perspektiva”, njofton simpatizuesit e vetë se të hënën e 6 tetorit 2014, nga ora 10, bëhet vazhdimi i verifikimit të nënshkrimeve për përkrahjen e Listës zgjedhore të kësaj shoqate joqeveritare, e cila merr pjesë aktive në këto procese të rëndësishme për shqiptarët e Luginës së Preshevës./Titulli.com/
