Propozimi i ekspertit amerikan: Kosova të kërkojë asociacion për shqiptarët në Luginën e Preshevës
Eksperti amerikan i politikës së jashtme, David Phillips, ka folur për Marrëveshjen e Ohrit, për të cilën kryeministri i Kosovës Albin Kurti dhe presidenti serb Aleksandar Vuçiq janë dakorduar më 18 mars.
Sa i përket Asociacionit, Phillipsi ka thënë se çfarëdo pushteti që i jepet Asociacionit duhet të shtrihet edhe në komunitetet etnike shqiptare në Luginën e Preshevës.
“Emri i shoqatës nuk është aq i rëndësishëm sa përcaktimi i kompetencave të shoqatës. Çfarëdo pushteti që i jepet Asociacionit duhet të shtrihet edhe në komunitetet etnike shqiptare në Preshevë, Bujanoc dhe Medvegjë. Simetria është e rëndësishme. Po kështu është një mekanizëm për monitorimin e zbatimit të kompetencave të Asociacionit në mënyrë që ato të kontribuojnë në stabilitetin afatgjatë dhe integritetin territorial të Kosovës”, tha ai për Telegrafin.
“Krijimi i Misioneve të Përhershme Diplomatike dhe vendimi për të hequr dorë nga pengesat ndaj anëtarësimit në BE janë hapa pozitivë. Kosova tashmë ka mbrojtje të gjerë të trashëgimisë kulturore të Serbisë në kushtetutën e saj dhe përmes respektimit të parimeve të Ahtisaarit. Dhënia e statusit special të Kishës Ortodokse Serbe në Kosovë përbën një precedent akomodues të rrezikshëm, veçanërisht duke pasur parasysh debatin e nxehtë mbi Asociacionin”, u shpreh ai.
Phillipsi foli edhe për rrezikun e destabilizimit të Ballkanit nga Rusia përmes Serbisë.
“Rusia po vepron përmes përfaqësuesit të saj, Qeverisë në Beograd, për të zgjeruar praninë ushtarake dhe për të destabilizuar rajonin. Rusia është një aktor i keq i kryesuar nga një regjim kriminal. Mbështetja e saj për Beogradin është më shumë e frymëzuar nga antiamerikanizmi sesa nga mbështetja për Serbinë. Rusia është e aftë për çdo aktivitet të poshtër. Një operacion ‘False flag’ mund të organizohet për të ndezur dhunën dhe për të minuar përparimin në Ballkan”, u shpreh ai.
