Më 21 maj 2015, në Bruksel, ishte nënshkruar marrëveshja për ndërtimin e pikës kufitare me Serbinë, në Kapi të Svircës.

Por, tre vjet e gjysmë pas, pikëkalimi që lidh Kamenicën me Medvegjën ende nuk është hapur edhe përkundër se ka gjysmë viti që ajo është e gatshme, raporton KTV.

Sipas MPB-së, Serbia po refuzon të funksionalizojë edhe pikën tjetër kufitare në Izvor, hapja e së cilës, po ashtu është pjesë e marrëveshje së arritur në Bruksel.

Për shkeljen e kësaj marrëveshjeje nga pala serbe, në këtë ministri thonë se i janë drejtuar disa herë Bashkimit Evropian.

Në kohën kur pikëkalimi po qëndron i mbyllur, prapa kamerës, policët kufitarë kanë thënë, se kohë pas kohe, detyrohen t’i kthejnë prapa qytetarët që ia mësyjnë kësaj pike.

Përderisa një kohë, Policia kosovare, e vendosur në Kapi, ka pasur probleme me furnizimin me rrymë elektrike. Tash e dy muaj – si pasojë e një prishjeje të pompës - ata po përballen me mungesë të ujit.