“Katër-pesë orë. Po shkojmë në Itali. Kjo pritje na bën të ndihemi shumë keq, është shumë lodhje. Po kthehemi për andej e të presim 4-5 orë është katastrofë”, ka thënë Liridon Etemi. 

Madje, ka pasur edhe mërgimtarë që kanë treguar se familjarët e tyre e kanë mbajtur radhën nga mëngjesi, që pastaj t’ua lirojnë.

“Unë për vete sapo erdha, por vëllai është duke pritur tash e katër orë. Ma ka zënë rendin. Kështu që sapo erdha, por katër orë i ka pritje. Për fëmijë është kohë shumë e gjatë sepse për fëmijë, po e shihni mbrapa ku është, të pres është diçka marramendëse”, ka thënë Dalip Isufi.

Policia ka theksuar se nuk e menaxhon e vetme pikën kufitare të Merdarit. 

“Lidhur me pyetjet e parashtruara nga ana juaj, u njoftojmë se Policia e Kosovës ka kapacitete të mjaftueshme për trajtim të procedurave gjatë kalimeve kufitare, duke mos u bërë shkak i pritjeve në kufi. Por, duhet të kihet parasysh se udhëtarët ndër-kufitar duhet të kalojnë në procedura kufitarë në dy kufij”, thuhet në përgjigjen e Policisë.

Sipas të dhënave të Qendrës Kombëtare për Menaxhimin e Kufirit, gjatë pasdites së të premtes pritjet në këtë pikë janë shkurtuar për gjysmë ore.

Ndërkohë, pika të tjera të ngarkuara kanë qenë edhe Dheu i Bardhë me mbi katër orë e gjysmë pritje dhe mbi tri orë i kanë kaluar Muçibaba, Mutivoda dhe Jarinja.