PD sqarim: LPD veproi në dëm të punëtorëve në administratën komunale në Bujanoc
Partia Demokratike ka sqaruar opinioni pas reagimit nga Lëvizja e Progresit Demokratik ndaj partnerit të koalicionit në komunën e Bujanocit duke u lidhur me vendiin e Këshillit Komunal i cili ka dhënë pëlqim për të ndryshuar sistematizimin e vendeve të punës në Administratën Komunale.
PD: SQARIM PËR OPINION RRETH SEANCËS SË DJESHME TË KËSHILLIT KOMUNAL TË KOMUNËS SË BUJANOCIT:
Gjatë ditës së djeshme, më 26.10.2023, Këshilli Komunal i komunës së Bujanocit ka mbajtur seancën e radhës, e cila në mesin e pikave të rendit të ditës , ka pasur edhe pikën rreth ndryshimit të sistematizimit të vendeve të punës në administratën komunale.
Ky ndryshim ka ardhur si rezultat i asaj që pas shumë kërkesave nga kryetari i komunës së Bujanocit drejtuar Ministrisë përkatëse për dhënien e pëlqimit për të punësuar kuadro në administratën komunale, dhe me ndihmën e OSBE-së, ministria në fjalë ka dhënë pëlqim për 10 punëtorë me kohë të pacaktuar.
Në këtë seancë nga 9 anëtarë të Këshillit Komunal, prezent ishin 6 prej tyre, prej ku me shumicë votash është votuar ndryshimi i sistematizimit të vendeve të punës, që hap rrugën për punësimin edhe të 10 punëtorëve tjerë me kohë të pacaktuar.
Çuditërisht, në këtë seancë nuk u paraqiten anëtarët e LPD-së, me veprimin e të cilëve u rrezikua që t’i humbasim këto 10 vende të punës, të cilat i kemi kërkuar për një kohë të gjatë.
Gjatë këtij mandati, për 3 vite qeverisje, vetëm në administratën komunale deri më tani janë punësuar gjithsej 10 shqiptarë me vendime të përhershme pune, kurse së shpejti do të punësohen edhe 10 të tjerë, e që sigurisht që nga janari do të ketë edhe të tjerë.
Partia Demokratike konsideron se ky është një sukses shumë i madh rreth punësimit të kuadrove në administratë komunale për këtë mandat, në krahasim me mandatin e kaluar 2016 – 2020, ku vetëm 3 persona janë punësuar në administatë, edhe atë 2 shqiptarë dhe 1 serb.
Prandaj, vlerësojmë se bojkoti nga ana e LPD-së është veprim i pa menduar mirë, dhe në dëm të punëtorëve.
