Në Viti mbahet orë letrare në manifestimin "Flakadani i Karadakut"

Këtë manifestim e shpalli të hapur drejtoresha për kulturë Kaltrina Sulejmani, e cila iu dëshiroi mirëseardhje poetëve të pranishëm, duke theksuar se edhe kjo pjesë e Flakadanit të Karadakut e ka peshën e vet, sepse poetët me poezitë e tyre i nderojnë luftëtarët e lirisë dhe manifestimin në fjalë.

Orën e madhe letrare e udhëhoqi poeti Sarë Gjergji, duke iu dhënë mundësi të lexojnë poetëve të të gjitha trevave shqiptare. Në këtë orë letrare lexuan 22 poetë, të cilët para të pranishmëve me poezitë e tyre sollën risi me larushi motivuese.

Nga Lugina e Preshevës me ftesë të organizatorit morën pjesë dhe lexuan Bilall Maliqi, Demush Berisha dhe Rexhep Abazi.

Ora letrare kishte karakterin garues. Juria profesionale për vlerësimin e poezive e përbërë nga poetët Sabit Rrustemi, Burhanedin Xhemaili dhe Bilall Maliqi, i vlerësuan tri poezitë më të mira të orës letrare.

Çmimi i parë i takoi poetit dhe studiuesit Ramadan Musliu, çmimi i dytë krijueses Kaltrinë Lohaj dhe çmimi i tretë poetit Jonuz Fetahaj.

Në këtë Manifestim nga drejtoria për kulturë e Vitisë, me vepër jetësore u nderua poetja, humanistja e njohur Flora Brovina.

Edicioni i XV-të i Manifestimit „Flakadani i Karadakut „ vazhdon me aktivitete të tjera edhe në dy ditët në vijim./Titulli.com/