Mbahet turneu i boksit në Bujanoc, boksierët shqiptarë trumfuan në të gjithë duelet (foto)

Në këtë turne përveç boksierëve vendas morën pjesë boksierë nga Kosova, Shqipëria, Maqedonia dhe Serbia, ndërsa turneun e madhështoi me pjesëmarrjen e tij legjenda e boksit shqiptar Aziz Salihu.

Në turne u zhvilluan gjithsejt nëntë meçe dhe të gjithë i fituan boksierët shqiptarë, përveç një dueli i cili përfundoi me barazim.

Vëllezërit Arbër dhe Flakrim Imeri edhe një herë u treguan superior ndaj kundërshtarëve të tyre, pasi i detyruan t’i dorëzojnë meçet në rundin e parë.

Arbër Imeri mposhti boksierin Sulejman Bego nga Maqedonia, ndërsa Flakrim Imeri boksierin Bozhidar Durmisheviq nga klubi “Tigrovi” nga Piroti.

Edhe boksieri tjetër tërnocas Muhamet Zahiri arriti fitore, pasi e mposhti boksierin Dejan Aleksiq nga Piroti, me ndërprerje në rundin e dytë, ndërsa boksieri Egzon Veseli nga KB “Tërnoci” u nda me barazim në luftën kundër boksierit Nikola Radeviq nga Piroti.

Në luftërat tjera, Angjelo Shkëmbi nga Shqipëria mposhti Almir Nurishovin e Maqedonisë me dorëzim të meçit në rundin e tretë, ndërsa në meçin më interesant të turneut Aleksandër Ramo nga Shqipëria mposhti boksierin Darko Stankoviq nga KB “Duboçica” nga Leskoci.

Boksieri i vetëm nga Kosova, Valdrin Hetemi mposhti boksierin Daniel Abazi nga Maqedonia, ndërsa Alban Bërmeta nga Shqipëria mposhti me ndërperje në rundin e dytë boksierin Dushan Stojanoviq nga Leskoci.

Në fund juria zgjodhi boksierin shqiptar Alban Bërmetën si “boksieri më teknik” i turneut, dyshja Alëksandër Ramo – Darko Stankoviq u zygjodhën “çifti më luftarak” i turneut.

Boksieri tërnocas Arbër Imeri u zgjodh “boksieri më fair – play”, ndërsa Flakrim Imeri u zgjodh “boksieri më i mirë i turneut”.

Publiku i pranishëm në sallë u nda i kënaqur nga luftërat dhe nga organizimi i punëtorit të palodhshëm sportiv, tranjerit të KB “Tërnoci”, Ridvan Imerit./Titulli.com/