Liderët e serbëve të Bujanocit: Jemi të kënaqur në koalicion me shqiptarët (Video)

Për të folur rreth kësaj çështje, mysafirë të nikoqirit të emisionit, Jeton Ismaili, ishin deputeti popullor në parlamentin republikan, Nenad Mitroviq, i cili njëkohësisht është edhe shef i “përparimtarëve” për komunë të Bujanocit dhe Stojança Arsiq, zv/kryetar i kësaj komune.

Liderët politik dhe institucional të serbëve të Bujanocit theksuan se koalicioni me Partinë Demokratike të Nagip Arifit i krijuar pas zgjedhjeve të vitit 2012 është ndërtuar krejtësisht në baza të shëndosha dhe qëllim mira, kurse inkuadrimi më pas edhe i partisë së Jonuz Musliut aspak nuk ka ndikuar në prishjen e raporteve përbrenda qeverisjes lokale.

“Të gjitha punët realizohen ashtu siç jemi marrë vesh, përfshirë edhe investimet të cilat dedikohen sipas një pariteti 60-40 % në raport midis vendbanimeve shqiptaro-serbe “, tha zv/kryetari Arsiq.

Njeriu i dytë i komunës së Bujanocit paralajmëroi edhe një vëzhgim të shtuar të zgjedhjeve të ardhshme lokale, ndërsa potencoi nevojën e mbajtjes së një regjistrimi të veçantë të popullsisë për këtë rajon.

I pyetur ndërkaq, përse qeveria nuk ka “shpërblyer” koalicionin multietnik me investime në komunën e Bujanocit, deputeti Nenad Mitroviq, theskoi se vizitat e shpeshta që po bëhen nga zyrtarët shtetërorë në Bujanoc janë një sinjal i qartë se gjërat po lëvizin në këtë drejtim.

Në ndërhyrjen e udhëheqësit të emisionit se mos vallë këta zyrtarë vetëm se po vijnë të fotografohen dhe gjithçka do të mbetet në domenin e vizitave, Mitroviq tha se koha do të dëshmojë të kundërtën.

Gjatë bisedës në studio, mysafirët paralajmëruan mundësinë që serbët në zgjedhjet e ardhshme të dalin me një listë zgjedhore, ndërsa thanë së është herët të prejudikohet që si rezultat në vitin 2016 mund të marrin postin e kryetarit të kuvendit e madje edhe atë të komunës.

Në emision u fol edhe për integrimin e shqiptarëve në institucionet shtetërore, për raportet me deputetët shqiptarë, privatizimin e ndërmarrjeve shoqërore, etj. /Titulli.com/ 

Emisionin e plotë me deputetin Mitroviq dhe zv/kryetarin Arsiq mund ta shikoni në linkun e mëposhtëm: