KBI, Nexhmedinit: Nuk reshte së vepruari për interesa përçarëse
Rriten tensionet mes udhëheqësve fetar në Luginë të Preshevës duke u akuzuar dhe etiketuar përmes reagimeve dhe deklaratave në media. Këshillat e Bashkësisë Islame (KBI) në Preshevë dhe Bujanoc kanë reaguar ndaj intervistës së fundit të Nexhmedin Ademit, koordinatorit të Grupit Punues për themelimin e Bashkësisë Islame unike në Luginë të Preshevës. Akuzat kanë shkuar aq larg sa që institucioni fetar (KBI) përmes një reagimi publik shkëput marrëdhëniet me Nexhmedin Ademin, derisa ia numëron të “bëmat e tij”. Shkak i prishjes së marrëdhënieve mes institucionit në fjalë dhe Ademit, sipas KBI-së është intervista e tij e fundit e dhënë në Televizionin Presheva. “Protagonisti Ademi këtë shfaqje të tij të orkestruar në formë teatrale kryekëput e dinakërisht e ka bërë me tendencë se kinse ai na qenka një faktor uniteti në vazhdën e ecurisë së proceseve integruese në sferën e unifikimit dhe bashkimit të imamëve dhe teologëve tjerë në këto hapësira tona”, thuhet në një pjesë të reagimit të KBI-së, transmeton Titulli. Duhet theksuar se koordinatori i grupit për themelimin e Bashkësisë Islame në Luginë, Nexhmedin Ademi, në emisionin e paradites në TV Presheva kishte reaguar lidhur me paraqitjen publike të Fikret Limanit, si myfti i bashkësive fetare në Luginë. “Nuk është myfti i Luginës por është i emëruar nga Muhamer Zukorliq për myfti në këtë rajon” ishte shprehur Ademi. Akuzat e fundit kanë shtuar edhe më shumë përçarjen mes dy Bashkësive Islame që veprojnë në Luginë, e kështu ka ndarë imamët e xhematin në dy tabore. Pas këtyre reagimeve si duket Lugina ka shkuar mbrapa në formimin e një Bashkësie Islame unike e cila do të fliste në një zë për besimtarët mysliman shqiptar të këtij rajoni./Titulli.com/ *********************************************************************************************************************************Reagimi i KBI-së
Këshillat e Bashkësisë Islame në Preshevë dhe Bujanoc skajshmërisht janë të indinjuar dhe të revoltuar me të pavërtetat dhe dezinformatat e llojit të parë të plasuar nga i vetëquajturi koordinator i Grupit punues për themelimin e një Bashkësie islame unike në Luginë të Preshevës. Nexhmedin Ademi, i cili duke shfrytëzuar mundësinë dhe hapësirën e ofruar në radio televizionin Presheva, në programin “Mysafirë i mëngjesit”, të realizuar më datë 4 dhjetor, plasoi çdo gjë pos realitetit dhe të vërtetës aq më shumë të kërkuar nga opinioni publik në vendin tonë. Realisht, protagonisti Ademi këtë shfaqje të tij të orkestruar në formë teatrale kryekëput e dinakërisht e ka bërë me tendencë se kinse ai na qenka një faktor uniteti në vazhdën e ecurisë së proceseve integruese në sferën e unifikimit dhe bashkimit të imamëve dhe teologëve tjerë në këto hapësira tona. Duke u fshehur tinëzisht prapa Grupit punues, i përmenduri për as një çast e moment nuk reshtë së vepruari për interesat përçarëse e meskine të të ashtuquajturës “BIPMB”, në stilin e dinakut perfid “hedh gurin e fsheh dorën”. Ndaj ne, me arsye të plotë e ndërgjegje të pastër i drejtohemi Nexhmedin Ademit: Ku ishe edhe pse nuk reagove dhe nuk e ngrite zërin në emër të grupit punues ku më datë 19,06,2013 reisi i bashkësisë islame të Serbisë Adem Zillkiç padronit tënd emnak Nexhemdin Saqipit ?! Përkundrazi , në vend se të ngriheshe zëshëm ndaj kësaj vizite kryekëput dhe në thelb përçarëse, ti zgjodhe heshtjen si veprim tëndin dhe aq më larg , madje u bëre sikur ishe i shurdhur dhe i verbër sikurse s’kishte ngjarë asgjë në këtë drejtim. Z.Ademi ku ishe e nuk reagove fare kur doli në skenë “BIPMB – ja “ ndërsa sipas marrëveshjes së të gjithë imamëve dhe teologëve tjerë patëm dalë me konkluzion që ajo ti ngrinte aktivitetet e saja.?!! Ku ishe kur pikërisht ku Nexhmedin Saqipi merrej me dezinformata e thashetheme okulare pa pasur edhe të vetmin fakt e argument e të cilat i plasonte nga disa portale, ku kishte qaje ai?! Edhe atëherë ti heshtje dhe vetëm heshtje dhe fërkoje duart nga gëzimi nga se ta kishte andja mposhtjen dhe etiketimet ndaj kolegëve tu edhe pse gjuha përçarëse nuk dispononte edhe me më të voglin argument. Edhe pse të është tëhequr vërejtja nga kolegët tuaj, nga grupi punues që të mos dilje në media me asnjë komunikatë apo intervistë, pa ndonjë konsultim apo mbledhje paraprake , përkundrazi ti dole në TV Presheva duke dhënë intervistën e diskutueshme. Grupi punues ka humbur kuptimin në funksionimin e tij pikërisht kur anëtari i këtij grupi nga Bujanoca u aktivizua si kryetar i “Këshillit të BIPMB-së” për këtë komunë. Kjo iu ka thënë Nexhmedin Ademit nga shumica e anëtarëve të këtij Grupi, që ky grup më nuk është i pranueshëm për ta. Pretendonit se jeni të pavarur në punët tuaja organizative të jetës fetare publike, kurse e vërteta duket krejtësisht ndryshe nga ajo që thoni ju. Tinëzisht jeni futur në listën e sigurimeve pensionalo – invalidore dhe ato shëndetësore të Adem Zillkiçit dhe të Jusufspahiqëve , nga të cilët botërisht e publikisht distancoheni. Marifeti juaj doli sheshazi kur me fillimin e vitit të ri rrjedhës shkollor 2013/2014 respektivisht nda data 02 shtator 2013 pa fije ndërgjegje larguat kuadrin më meritorë të lëndës së mësimit fetar “ilmuddini” nga shkollat publiken Preshevë e Bujanoc për të zëvendësuar ato me individë të pakualifikuar apo gjysmë të kualifikuar, që shikuar realisht, nuk janë të denjë dhe meritorë që në mënyrë profesionale ti bartin njohuritë e tyre islame, qofshin ato edhe simbolike deri tek nxënësit tanë. Ne tashmë jemi të njoftuar për të gjitha të bëmat tuaja. Ndaj, me anën e këtyre disa rreshtave vetëm se deshëm të trokasim në ndërgjegjen tuaj të molisur nga apetitet denigruese dhe të pangopura e egoiste. Të apelojmë deri tek ju për reflektime e këndellje nuk kemi as më të paktën shpresë. Këtë e bazojmë në tentativat dhe orvatjet tona një deceniesh për t’iu trazuar nga gjumi i rëndë në të cilin jeni katandisur e assesi të zgjoheni dot. Lundroni në botën e fantazmave që megjithatë nuk iu shpijnë assesi në ujërat e qeta paqësore. Në përmbyllje të reagimit tonë të imponuar e aspak të dëshiruar, por përkundrazi të imponuar e të detyruar nga daljet tuaja publike të tejmbushura përplot shantazhe, ua bëjmë me dije se pavarësisht mënyrës apo formës që ju e pranoni një gjë të tillë të daljes sonë publike, ne vendosmërisht përfundojmë çdo lloj komunikimi me ju në formën e paraqitur në këtë mënyrë publikisht.
