Hoti: Korrigjimi i kufijve, korrigjim i pavarësisë së Kosovës

Shefi i Grupit Parlamentar të LDK-se, Avdullah Hoti, ne seancën e jashtëzakonshme të Kuvendit të Kosovës e cila po mbahet tani, tha se angazhimi i presidentit Hashim Thaçi për korrigjim të kufirit me Serbinë është kundërkushtetues, raporton “Zëri.info”.

Në seancën që po mbahet pikërisht për të debatuar rreth kësaj çështjeje, Hoti ka thënë se pakënaqësia e qytetarëve tashmë ka arritur në pikën kulmore lidhur me këtë çështje.

“Është e qartë që këto veprime të presidentit janë antikushtetuese. Diskursi i Thaçit për gjoja mbështetjen ndërkombëtare është mashtrim”, deklaroi ai.

Hoti më tej, tha se LDK është për të dialoguar me Serbinë, por jo në mënyrën si po vepron kreu i shtetit. Kjo pasi, siç ai është shprehur, ideja për t’i korrigjuar kufijtë do të thotë vetë korrigjim i pavarësisë së Kosovës. 

“Ideja e korrigjimit i bën këto pritje konfuze, korrigjimi i kufijve është korrigjim i pavarësisë së Kosovës”, potencoi ai.

Me këtë rast, Hoti tha se territori i Kosovës është një dhe i pandashëm dhe se askush nuk ka të drejtë që ta vëjë në pikëpyetje këtë çështje.

Me votën pro rezolutës për ta ndalë Thaçin në idenë e korrigjimit të kufirit, Hoti tha se krijohet siguri për qytetarët.