Lokale
“Guart e Buajve”, vendi ku fillon shënimi i “Ditëve të Komandant Lleshit” (foto)
Me vizitën tek “Guart e Buajve”, vendin ku ra dëshmor Ridvan Qazimi – Komandant Lleshi, ka filluar edhe zyrtarisht manifestimi tradicional “Ditët e Komandant Lleshit”.
Një numër i konsiderueshëm i qytetarëve shqiptar të komunës së Bujanocit dhe më gjerë, sot nga stadiumi i fshatit Tërnoc marshuan për tek vendi i rënies së Komandant Lleshit, në përkujtim të veprës së tij, raporton Titulli.
Me këtë rast u vendosën kurora me lule në vendin e vrasjes tinëzare të Lleshit, sot para 13 viteve.
Haxhi Hisen Qazimi përshëndeti masën për pjesëmarrje duke falënderuar që edhe pas këtyre viteve nuk harrohet vepra e dëshmorit dhe djalit të tij, Ridvan Qazimit.
Para të pranishëmve foli edhe kryetari i Kuvendit Komunal të Bujanocit, njëherit ish shefi politik i UÇPMB-së Jonuz Muliu. Ai mes tjerash tha se nuk duhet harruar dëshmorët të cilët ranë për lirinë e këtij vendi.
Në nderim të kontributit të Ridvan Qazimit në sport, Klubi futbollistik Tërnoci organizoi edhe një ndeshje miqësore në mes të KF Tërnocit dhe KF Bilaçit e cila përfundoi me rezultat 3:1 në favor të tërnocasve.
Me këtë rast drejtori i klubit Enis Salihu theksoi se Komandan Lleshi kishte dhënë një kontribut të lartë në zhvillimin e klubit nga Tërnoci, që një kohë edhe ishte kryetar i klubit.
Ai premtoi se sukseset që ky klub i kishte atëherë do t’i vazhdojë edhe në të ardhmen.
“Ditët e Komandant Lleshit” vazhduan të shënohen sipas agjendës të paraparë nga organizatorët. Në orën 20:00 u shfaq Festivali i filmit shqip të metrazhit të shkurt “Shkurt, Shqip për Vajën” në regji të Avni Dalipit, në shtëpinë e kulturës në Bujanoc.
Koordinatori i manifestimit Naim Salihu tha se me këtë festival Bujanoci llogaritet ndër qytete artdashëse dhe kultivues të artit, duke falënderuar të gjithë që kontribuuan për mbajtjen e këtij manifestimi.
Për ditën e diel (25 maj), kur edhe përmbyllet manifestimi tradicional “Ditët e Komandant Lleshit” nga ora 14:30 – 15:30 do të bëhet vizita e muzeut të Komandant Lleshit, prej orës 15:30 – 16:00 Homazhe tek Lapidari i Komandant Lleshit.
Në shtëpinë e kulturës në Bujanoc me fillim në orën 17:30 deri në orën 19:00 mbahet manifestimi qendror ku bëhet edhe ndarja e mirënjohjeve për filmat shqip të metrazhit të shkurt (Shkurt, Shqip për Vajën), ndërsa në orën 19:00 përmbyllet manifestimi tradicional “Ditët e Komandant Lleshit”./Titulli.com/
Mund ti tregoni shoqërisë për këtë artikull!
