E vetmja zgjidhje afatgjate për Luginën e Preshevës, parimi i reciprocitetit
Kryetari i Lëvizjes për Bashkim, Valon Murati, me bashkëpunëtorë, priti në një takim pune udhëheqësit e fushatës "Lugina do Zgjidhje".Murati diskutoi për rezultatet e deritanishme të fushatës si dhe për platformën e Lëvizjes për Bashkim lidhur me bisedimet me Serbinë, ku përfshihet reciprociteti në mes të tri komunave në veriun e Kosovës: Zveçan, Zubin Potok e Leposaviq dhe tri komunave të Kosovës Lindore Preshevë, Medvegjë e Bujanoc.
Në këtë takim, Murati shprehu shqetësimin e LB-së për mungesën e platformës së institucioneve të vendit, e rrjedhimisht, mospërfshirjen e problemit të Kosovës Lindore në bisedimet e tyre me Serbinë. Gjithashtu, ishte qëndrim i përbashkët se e vetmja zgjidhje afatgjate për problemin shqiptaro-serb mund të jetë ajo që arrihet mbi parimin e reciprocitetit.
Kryetari i LB-së, Valon Murati shprehu edhe një herë mbështetjen e pa rezervë të Lëvizjes për Bashkim për Fushatën “Lugina do Zgjidhje” dhe e përshëndeti deklaratën e përfaqësuesve të komunave Preshevë, Medvegjë dhe Bujanoc.
Palët u pajtuan që ta vazhdojnë bashkëpunimin në funksion të përfshirjes së çështjes së Kosovës Lindore në agjendën e bisedimeve dhe përfshirjen e sa më shumë faktorëve politikë, por edhe të shoqërisë civile e medias, në këtë çështje.
