Lokale
Bujanoc: E gjithë salla në vaj (foto & video)
U nisë me të qeshura të pranishmëve ndërsa përfundoi me lot në sy, ky ishte efekti i dramës “Mësimet e fesë rregullojnë familjen” të organizuar nga Departamenti i të Rinjve dhe Gruas pranë Këshillit të Bashkësisë Islame në Bujanoc.
Drama me tematikë fetare e organizuar në shënim të ngjarjes së “Israsë dhe Miraxhit” eklipsoi fjalimet e krerëve të institucioneve fetare e komunale, duke prekur thellë emocionet e shikuesve në sallën përplot në shtëpinë e kulturës në Bujanoc.
Në hapje të këtij manifestimi para masës u paraqitën dy udhëheqësitë e Këshillave të Bashkësisë Islame në Bujanoc e Preshevë, Sulejman Fejzullahu e Fikret Limani, të cilët përvec përshëndetjeve folën rreth historikut të natës së “Israsë dhe Miraxhit”, raporton Titulli.
Të pranishmit i përshëndeti edhe kryetari i Kuvendit Komunal të Bujanocit Jonuz Musliu, ndërsa më pas programi vazhdoi me ilahi e monolog, për t’i ardh radha dramës, e cila ngriti interesimin tek shikuesit prezentë: nxënës, mësimdhënës, teolog dhe qytetarë të komunës së Bujanocit.
“Mësimet e fesë rregullojnë familjen” ishte titulli i dramës fetare, që paraqiti realitetin e shoqërisë sonë të ditëve të sotme.
Shpjegimi i dramës
Drama nën regjinë e Ragmi Destanit dhe Abdurrahman Muratit përshkruan gjendjen në një familje e lënë nga babai që i ishte futur bixhozit, përderisa jetonin vetëm me nënën, kurse dy nga tre fëmijët ishin të padëgjueshëm ndaj prindërve të tyre.
Shakat dhe pakujdesi i tyre sa bëheshin në shtëpi aq më shumë vazhdonte në shkollë, derisa erdhi momenti i kthesës pas fillimit të mbajtjes së orëve të mësimit fetar.
Këshillat e profesorit ndikuan në ndryshimin e pikëpamjeve tek Arta e cila së bashku me vëllaun Samirin ishin më të padëgjueshëm në shtëpi e shkollë.
Epilogu i dramës merr fund kur me iniciativën e Artës bashkohet familja duke e sjellë edhe babain në shtëpi.
Momenti kulminant i shfaqjes “Mësimet e fesë rregullojnë familjen” i përloti të pranishmit në sallë përderisa të rinjve i dha një mësim të mirë rreth mënyrës së sjelljes në shtëpi, shkollë e shoqëri.
Departamenti i të Rinjve dhe Gruas pranë Këshillit të Bashkësisë Islame në Bujanoc gjatë muajit prill kishte organizuar edhe tribunën kundër alkoolit “Alkooli – maturantët dhe ekskursioni” që kishte ngjallur interesim dhe pjesëmarrje të qytetarëve në këtë organizim./Titulli.com/
Mund ti tregoni shoqërisë për këtë artikull!
