Zyra për të rinj në Bujanoc aktive edhe ndaj refugjatëve (foto)

Derisa refugjatët pritnin autobusin nga Bujanoci për Beograd e Suboticë, për të vazhduar më tej drejtë shteteve të Evropës perëndimore, ata u ndihmuan nga organizata të ndryshme, e njëra prej tyre ishte edhe Zyra për të rinj pranë komunës së Bujanocit.

“Ne kemi ndihmuar refugjatët me gjëra ushqimore dhe veshmbathje, që vullnetarët e zyrës sonë i kanë siguruar nëpër institucione të ndryshme, xhamia, organizata joqeveritare, kompani private por edhe nga qytetarët” , thotë Vjollca Aliu, koordinatore e Zyrës për të rinj në Bujanoc.

Aliu shprehet se kanë  pasur një bashkëpunim mjaftë të mirë edhe me OSBE-në, të cilët i kanë dal në ndihmë në distribuimin e veshmbathjeve, ndërsa thekson se nga  ambasada amerikane në Beograd  kanë marrë një mirënjohje për ndihmën që i kanë ofruar refugjatëve.

“Rreth 100 vullnetarë të zyrës sonë janë angazhuar në këto aktivitete, duke i shpërndarë ndihmat tek stacioni i autobusëve. Ata gjithashtu janë njohës të gjuhës angleze dhe i kanë ofruar refugjatëve edhe ndihma tjera, në mënyrë që ata të kenë sa më të lehtë qëndrimin e përkohshëm në Bujanoc”, thekson Aliu.

Sipas fjalëve të saj, këto aktivitete kanë zgjatur rreth dy muaj, ndërsa  ushqimin dhe veshmbathjet që i kanë mbetur kanë vazhduar të shpërndajnë në Preshevë. 

Vlen të theksohet se pas rritjes së kapaciteteve të stafit për regjistrimin e refugjatëve në Qendrën e pranimit në Preshevë, në Bujanoc tanimë nuk vijnë refugjatët, pasi të gjithë regjistrohen në Preshevë dhe me autobusë vazhdojnë rrugëtimin e tyre drejtë Evropës perëndimore./Titulli.com/