Lokale
“Vatra”: Lugina mbetet një bombë e kurdisur
Lidhur me rrjedhën e bisedimeve Kosovë- Serbi dhe rezultatin që do të prodhojnë ato, ka dalë me një komunikatë shoqata e Shqiptarëve të Kosovës Lindore “Vatra”, e cila konsideron se “do të jetë i mangët pajtimi Kosovë - Serbi pa zgjidhjen e çështjes së Luginës, ngase moszgjidhja e këtij problemi do të ishte një bombë e kurdisur në mes të Ballkanit”.
Në kumtesë thuhet se “shqiptarët e Kosovës Lindore, përveç diskriminimit të vazhdueshëm që u janë nënshtruar para, por edhe pas përfundimi të luftës në mes UÇPMB-së dhe forcave ushtarake policore serbe, këto ditë u janë nënshtruar një presioni shtesë, shkaku i bisedimeve mes dy shteteve”.
“’Vatra’, shumë herë ka tërhequr vërejtjen te të gjithë faktorët relevant gjithandej për situatën e krijuar në Luginë, mirëpo nga të gjithë kemi marrë vetëm përkrahje morale. Për koincidencë nga e 1913 deri më 2013, kurrë nuk na u nda gazepi”, thuhet në kumtesë.
“Kur merret parasysh edhe lufta e UÇPMB-së e gjaku i atyre dëshmorëve dhe shumë sakrifica tjera të popullit, por edhe e drejta legjitime për bashkim, habitemi si në bisedimet e sotshme Kosovë-Serbi, nuk u kushtëzua që edhe kjo pjesë të përfshihet në dialog. Madje, atëherë kur popujt e Evropës dhe të tjerët qarkullojnë lirshëm , neve, shqiptarëve të Kosovës Lindore na është kufizuar e drejta e lëvizjes së lirë duke na gjobitur me taksa doganore dhe janë vënë barriera tjera që po pengojnë lëvizjen e lirë dhe po e rëndojnë jetën e qytetarëve tanë atje”, thuhet në kumtesën e “Vatrës”.
“Përgjegjësinë për këtë e mbanë Bashkimi Evropian sikurse edhe të gjithë faktorët relevant vendor, sepse deri sa Evropa të merr vendime në dëm të popullit shqiptar, e duke privilegjuar shtetin që kurrë nuk u ngop së uzurpuari me tokat tona, këtu qetësi nuk do të ketë! Prandaj, kërkojmë nga kryeministri i Kosovës të bëjë gjithçka që është e mundur, të mos e harrojë këtë pjesë të territorit, dhe askush të mos pretendojë, e sidomos Serbia, se problemi i Kosovës Lindore do të mbyllet me disa premtime për disa të drejta të avancuara në arsim, shëndetësi, hapjen e një fakulteti, njohje të diplomave e disa të drejta minore që do të pranoheshin edhe në shtetet që nuk kanë demokraci të zhvilluar”, thuhet më tej në kumtesë.
Duke pas parasysh gjendjen e krijuar, kur populli kërkon zgjidhje, “Vatra” konsideron se edhe liderët e Kosovës Lindore do të duhej të bënin diçka, e më e pakta që mund dhe duhet të bëjnë do të ishte ngrirja momentale e bashkëpunimit me institucionet Qendrore të Qeverisë së Serbisë me mundësinë e largimit edhe nga ato lokale.
“Ne mendojmë se do të jetë i mangët pajtimi Kosovë - Serbi pa zgjidhjen e çështjes së Luginës, ngase moszgjidhja e këtij problemi do të ishte një bombë e kurdisur në mes të Ballkanit, që askush nuk do të dijë kur mund të aktivizohet”, thuhet në kumtesën e nënshkruar nga Sejdulla Kadriu, kryetar i “Vatrës”. /Titulli.com/copy(/home/titulli/public_html/images/image/t/uploads/2013/03/lugina.jpg): failed to open stream: No such file or directory
Mund ti tregoni shoqërisë për këtë artikull!
