Mitet për vaksinën kundër COVID-it ushqejnë skepticizmin (video)

Njerëzit në mbarë botën kanë pyetje për sigurinë e vaksinave kundër COVID-19. Disa janë shprehur në mëdyshje për vaksinimin. Materiali në vazhdim analizon disa nga mitet që ekzistojnë për vaksinat kundër COVID-it. 

Shkencëtarët në mbarë botën kanë punuar gjatë vitit të fundit intensivisht për të krijuar vaksinat kundër COVID-19 që ka shkatuar mbi 2 milionë viktima dhe ka infektuar mbi 100 milionë vetë në mbarë botën. 

Por megjithëse është provuar se vaksinat ofrojnë mbrojtje nga sëmundja, ende vazhdojnë dyshimet në popullatë:  

"Nuk di çfarë të besoj, lajmet apo ato që thuhen gjithandej,” thotë një burrë. 

"Kam dyshime, sepse nuk e di nëse do të më ndikojë tek sistemi imunitar,” thotë një grua. 

“Nuk e di përse duhet të vaksinohem për një sëmundje që ndoshta nuk do të më prekë kurrë,” thotë një grua. 

Skepticizmi është i pranishëm në qytete të mëdha si Los Anxhelos, ashtu edhe në qytete të vogla në Uest Virxhinia. 

"Problemi është nëse të shkakton probleme, por nuk të mbron nga virusi. Si i bëhet,” pyet një burrë. 

Disa vaksina janë krijuar me viruse të dobësuara ose pa jetë. Por ekspertët thonë se njerëzit nuk duhet të shqetësohen. 

Dr. Tosin Goje, i Klinikës së Klivlendit është specialist i sëmundjeve infektive. 

"Nuk të sëmur me COVID. Nuk ka virus aktiv. Nuk do të infektohesh prej saj,” thotë mjeku. 

Megjithëse këto janë vaksina të reja, Dr. Goje thotë se janë prodhuar me teknologji ekzistuese: 

“Teknologjia u zhvillua fillimisht për pacientë me kancer. Pra nuk është teknologji që u zhvillua këtë vit për COVID-in, por ka qenë në përdorim edhe më parë. Kur lindi kjo nevojë u kuptua se kjo teknologji shërben edhe në këtë situatë”.

Organizata Botërore e Shëndetësisë ka një faqe elektronike ku analizon mitet dhe shqetësimet për vaksinat dhe vetë virusin. 

Ndër to: Kush mund të sëmuret me COVID? Përgjigjja: Të gjithë. 

A ndihmojnë disa ushqime për t’u mbrojtur nga virusi? A ia vlen të marrësh vitamina si mbrojtje? Sipas OBSH-së nuk ka prova që tregojnë ndonjë efekt pozitiv nga ushqimet apo vitaminat.

 Ka pasur teori se vaksina të ndryshon kodin gjenetik. 

"Të ndryshon ADN-në dhe bëhesh trans-human, pasi do të kesh në trup nano-pjesëza,” thotë një grua. 

Vaksinat e kompanive Pfizer, Moderna dhe Sputnik janë zhvilluar bazuar mbi kodin ARN, zgjatimi proteinor që gjendet edhe tek koronavirusi. 

Këto vaksina u mësojnë qelizave të personit të vaksinuar të prodhojë proteinën, ose një fragment të saj që nxit reagimin e sistemit imunitar. 

"Nuk të ndryshon ADN-në. Njerëzit mendojnë se vaksina do t’i ndryshojë. Por ajo nuk integrohet në ADN-në e individit. Nuk e ndryshon,” thotë eksperti Goje. 

Organizata Botërore e Shëndetësisë ka bërë thirrje për fushata masive për informimin e publikut në përgjigje të shqetësimeve të ngritura. 

Ekspertët thonë se vaksinat, si dhe masat parandaluese, si larja e duarve, maskat dhe distancimi fizim, do të ndihmojnë për t’i dhënë fund pandemisë, vetëm nëse masa të tilla vihen në zbatim.