Lokale
Halimi: Daçiqit duhet t’i bëhet presion ndërkombëtar
Në kohën kur është duke u mbajtur takimi Thaçi-Dacic në Bruksel, deputeti i vetëm shqiptar në Parlamentin e Serbisë, Riza Halimi, nuk është shumë optimist se kryeministri serb do të marrë shumë në konsideratë kërkesat e shqiptarëve të Luginës së Preshevës, të cilat pritet t’i artikulohen nga goja e kryeministrit të Kosovës. Në një prononcim për Telegrafin, Halimi ka deklaruar se autoritetet e Beogradit lëshojnë pe në rast të presionit dinamik nga ana e ndërmjetësve ndërkombëtarë, diçka që sipas tij, ka munguar gjatë përpjekjeve për të zgjidhur situatën e krijuar në rastin e lapidarit të UÇPMB-së.
Halimi ka deklaruar se në rastin e lapidarit, ndërmjetësit ndërkombëtarë zakonisht janë përpjekur që të gjejnë një lloj kompromisi, në shumë raste edhe duke kërkuar zhvendosjen e monumentit.
“Zyrtarët serbë e shfrytëzojnë situatën kur ndërkombëtarët thonë se kërkesat e shqiptarëve janë çështje e brendshme e Serbisë. Në fakt, këso deklarata ndërkombëtare ka pasur edhe gjatë konfliktit të armatosur të vitit 2001. Por, asokohe vet autoritet e Beogradit patën kërkuar ndihmë ndërkombëtare për ta zgjidhur problemin”, ka thënë Halimi.
Ai vlerëson se bashkësia ndërkombëtare duhet të jetë më e vendosur për të bërë presin ndaj autoriteteve të Serbisë. Sipas tij, një hap që do të ndihmojë për dinamizmin e procesit është fakti se çështja e lapidarit ka treguar se faktori shqiptar është i unifikuar kur bëhet fjalë për kërkesat jetike të shqiptarëve.
“Është praktikë e autoriteteve të Beogradit që t’u arsyetohen ndërkombëtarëve se shqiptarët nuk janë të unifikuar, prandaj nuk kanë partner serioz për të negociuar. Por, u kemi bërë të qartë se flasim me një zë”, ka thënë Halimi.
Deputeti shqiptar në Parlamentin serb ka theksuar se gjatë takimit që kanë pasur me kryeministrin e Kosovës kanë diskutuar edhe për përbërjen e ekipeve negociatore. Halimi ka thënë se ata vazhdojnë që të mbajnë qëndrimin se shqiptarët e Luginës do të kërkojnë të hyjnë në ekipin e Prishtinës në rast se serbët e Kosovës hyjnë në përbërjen e delegacionit të Beogradit.
“Normale do të ishte që serbët të jenë pjesë e ekipit të Kosovës, e shqiptarët në ekipin e Serbisë. Në të kundërtën gjendja veçse do të tensionohej”, ka thënë Halimi. /Titulli.com/copy(/home/titulli/public_html/images/image/t/uploads/2013/01/riza-halimi-600px.jpg): failed to open stream: No such file or directory
Mund ti tregoni shoqërisë për këtë artikull!
