Pushteti e zë lepurin me karrocë!

Vendimi i ndryshimeve statutare të miratuara nga këshilltarët komunalë, në lidhje me dhënien e pëlqimit të integrimit të Ndërmarrjes Publike “Direkcioni” në Ndërmarrjen Publike “Komunalia”, është një hap konkret drejt funksionimit të mirë të qeverisjes lokale. 

Këto reforma aspak nuk janë të dëmshme e as të rrezikshme se si i paraqesin “partizanët” e vegjël të opozitës! 

Administrata komunale e Bujanocit, nga këto reforma, në të ardhmen, do të ketë nëntë nga shtatë departamente sa kishte dikur. 

Por, ndryshimet që erdhën me zgjedhjet e fundit, opozita po i merr me zarar. Ajo, si duket akoma nuk po pajtohet me humbjen e pushtetit. Herët ka filluar ta humbas rrugën në oborr. 

Të gjithë ata, të cilët gjatë mandatit të kaluar, keqpërdorën pozitat pushtetare në emër të nepotizmit dhe klaneve partiake, e të cilët edhe pas humbjes së pushtetit provuan të krijojnë “enklava” brenda ndërmarrjeve publike, do të përballen me një “stuhi”, nga e cila zor se do të munden të thyejnë “trak”, në stilin e dhelprës së kuqrremët! 

Të parët tanë na kanë lënë një fjalë të urtë shumë të qëlluar: “Pushteti e zë lepurin me karrocë!”, sidomos gjatë sezonit të dimrit, kur rrugët tona me kthesa e smeqe, nuk lejojnë fizkultura akrobatike. 

Me avash - avash, qeverisja lokale, po merr drejtimin e duhur edhe në Preshevë, duke sjell risi në udhëheqje dhe vendimmarrje. 

Jemi në muajin dhjetor, i cili po i afrohet fundvitit, ndërrimit të motmotit, kur Babadimri, si zakonisht, do të shpërndaj dhurata e kartolina urimi, e , mjerisht, disa nga opozitarët nuk do t’i gëzojnë peshqeshet e dikurshme pushtetare, veç ndonjë zarfi të kaltër ose të bardhë në shenjë dhurate nga sistemet e drejtësisë! 

Kështu e ka politika: “Me rripa -  rripa........ !” 

Shkruar nga Sevdail Hyseni-Bujanoc;