Problemet e luginasve paraqiten në Ambasadën e Republikës së Shqipërisë
Ambasadori i Republikës se Shqipërisë në Prishtinë, Qemajl Minxhozi, të martën ka pritur në takim përfaqësuesit e Lëvizjes Qytetare "Vatra" me seli në Gjilan, kryesuar nga kryetarja, Gentiana Shabani.Përmes një kumtese kjo Lëvizje njofton se gjatë takimit është diskutuar për problemet e qytetarëve të dëbuar nga Lugina e Preshevës që jetojnë në Kosovë.
Kryetarja nga Lëvizja “Vatra”, Gentiana Shabani i ka dorëzuar ambasadorit Minxhozi një listë të problemeve me të cilat ballafaqohen qytetarët e dëbuar nga Lugina, e që jetojnë në Kosovë, me theks të veçantë, problemet e pajisjes me dokumente identifikimi, problem ky që po i preokupon qytetarët e kësaj pjese që jetojnë në Kosovë tash e 16 vite.
Siç njofton “Vatra”, ambasadori shqiptar Qemajl Minxhozi është shprehur i lumtur me zgjedhjen e Gentiana Shabanit për kryetare të Lëvizjes Qytetare "Vatra", duke shprehur gatishmërinë që problemet e qytetarëve të dëbuar nga Lugina e Preshevës të ngritjen në instancat më të larta të Republikës së Shqipërisë.
Ambasadori Minxhozi është zotuar se do të angazhohet maksimalisht për gjetjen e një zgjedhje të përhershme të këtyre problemeve me të cilat po ballafaqohen qytetarët e dëbuar me dhunë nga shtëpitë e tyre. /Titulli.com/
