Myftiu Saqipi vizitoi Ambasadën e Arabisë Saudite në Tiranë

Sipas njoftimit të BIPBM-së delegacionin nga Lugina është pritur nga personalitete të larta të Ambasadës, me shkëlqesinë e saj Ambasadorin Talat Salem Radvan, pastaj zv. ambasadori Abdullah Al Mushayt dhe Konsuli Fahad Alhathal.

“Gjatë këtij takimi me karakter pune Myftiu Saqipi, fillimisht falënderoj Ambasadorin për kohën e ndarë rreth kësaj vizite dhe interesimin e shprehur për të mësuar më afër për jetën e qytetarëve në Luginë të Preshevës”, thuhet në kumtesën e BIPBM-së. 

Gjithashtu theksohet se Myftiu Saqipi ka njoftuar detajisht ambasadorin për gjendjen e vështirë politike dhe ekonomike në të cilën ndodhet aktualisht Lugina e Preshevës. 

Në kuadër të këtij takimi u potencua nevoja e një angazhimi më të madh të faktorëve relevantë vendorë dhe ndërkombëtarë, për tejkalimin  e kësaj situate në shërbim të krijimit të një klime të stabilitetit, paqes dhe bashkëpunimit ndër rajonal. 

“Lugina e Preshevës, gjithmonë, ka qenë një shembull i mirë i një vendi, i cili ka reflektuar paqe, bashkëjetesë dhe solidaritet e në këtë drejtim një kontribut të posaçëm e ka dhënë Bashkësia Islame për Preshevë, Bujanoc dhe Medvegjë”, thuhet në kumtesë.

Ambasadori Talat Salem Radvan me këtë rast ka falënderuar Myftiun Saqipi për vizitën, duke shprehur gatishmëri për një bashkëpunim më të ngjeshur në të ardhmen dhe duke shfaqur interesimin për një vizitë Serbisë dhe Luginës së Preshevës. /Titulli.com/