Idrizi: Nuk duam historinë për shqiptarët e Luginës, ashtu siç ndodhi me Çamërinë

Në këtë takim ishin të pranishëm Riza Halimi ish deputet shqiptar në Parlamentin Serb, Shaip Kamberi, kryetar i Komunës Bujanoc, Xhelal Mehmeti zëvendëskryetar i komunës së Preshevës dhe Adnan Ymeri nga Fondi Humanitar.

Idrizi u shpreh se është detyrë funksionale e Shqipërisë që të kujdeset për të gjithë shqiptarët, të cilët janë jashtë atdheut.

“Ne nuk e shohim këtë si folklorizëm apo ndryshim kufijsh, por është një proces për të cilin duhet të fillojmë të punojmë. Duhet të bashkëpunojmë më shumë me shqiptarët që jetojnë jashtë kufijve, në arsim, në ekonomi dhe shumë fusha të tjera. Edhe në Kushtetutën e Shqipërisë parashikohet qartë që të punohet për bashkimin e shqiptarëve”, u shpreh Kryetari i PDIU-së.

Gjithashtu Idrizi vuri theksin tek rritja e trysnisë në mënyrë që shqiptarët e Preshevës, Bujanocit dhe Medvegjës të kenë më shumë të drejta në territorin ku jetojnë.

“Ne nuk duam që historia të përsëritet për shqiptarët, ashtu siç ndodhi me shqiptarët e Çamërisë. Pra, pamundësia për të jetuar aty, t’i detyrojnë për ta braktisur atë vend", tha ai.

Përfaqësuesit nga Presheva, Bujanocit dhe Medvegjës kërkuan mbështetjen e deputetëve të PDIU-së, për projektin e autostradës që është realizuar nga Durrësi deri në Prishtinë dhe do të vijojë deri në Serbi.

Ata kërkuan që kjo rrugë të përshkruajë territorin e Medvegjës ndërsa Idrizi dhe deputetja Mesila Doda theksuan se do të mbështesin këtë projekt, i cili u shërben të gjithë shqiptarëve.