Departamenti Amerikan i Shtetit: Rusia kërcënon Ballkanin

Shtetet e Bashkuara të Amerikës mbeten të angazhuara për të mbrojtur rajonin e Ballkanit Perëndimor ndaj manovrave dashakeqëse ruse që kanë si synim kryesor destabilitetin.

Në një deklaratë të publikuar në rrjetin social X, zëdhënësi i Departamentit Amerikan të Shtetit Matthew Miller e beri të qartë se Washingtoni do të vijojë të vendosë masa ndëshkuese ndaj individëve dhe ndaj entiteteve që kërcënojnë integritetin e institucioneve shtetërore në rajon.

Milleri shkroi se “Duke iu kundërvënë veprimeve destabilizuese të Rusisë në Ballkanin Perëndimor, Shtetet e Bashkuara njëkohësisht angazhohen për të ndëshkuar aktorët e korruptuar që përpiqen të minojnë institucionet shtetërore në të gjithë rajonin”.

Shtetet e Bashkuara të Amerikës sanksionuan një ditë më parë 10 individë nga vendet e Ballkanit Perëndimor për përhapje të ndikimit rus në rajon dhe përfshirjen e tyre në akte korruptive.

Në mesin e individëve të sanksionuar ishin zyrtarë të lartë nga Bosnjë e Hercegovina, Mali i Zi, Maqedonia e Veriut dhe Serbia.

Shtetet e Bashkuara të Amerikës e kanë bërë të qartë edhe më parë nëpërmjet qëndrimeve të tyre zyrtare se do të vijojnë luftën e tyre kundër ndikimit dashakeqes rus në rajonin e Ballkanit Perëndimor që synon të kërcënojë sundimin e ligjit, stabilitetin dhe sovranitetin ne rajon.