Lokale
Blofi qeveritar për tarifat doganore, Lugina akoma në geto
Kërkesat e vazhdueshme të shqiptarëve të Luginës së Preshevës për uljen e tarifave kufitare me Kosovë, duket se ka pak gjasa që të realizohen edhe përkundër premtimit të Qeverisë së Kosovës.
Kjo e fundit, si shenjë reciprociteti me Serbinë, ka vendosur tarifat kufitare për ata që hyjnë nga Serbia në Kosovë, nga dhjetori i vitit të kaluar, si rrjedhojë e marrëveshjes Prishtinë - Beograd në Bruksel.
60 euro është pagesa minimale që një person duhet të paguajë sigurim nëse hyn me veturë nga Serbia në Kosovë, e cila vlen vetëm për 2 javë qëndrim, për çka shqiptarët e Luginës së Preshevës thonë se në vend të lirisë së lëvizjes, janë izoluar edhe më shumë, për faktin se këto tarifa janë jashtë çdo normaleje.
Si pasojë e ankesave të vazhdueshme, Qeveria e Kosovës është zotuar se do të bëjë gjithçka që është e mundur, për t’i ulur ato tarifa apo për t’i hequr krejt. Dy javë më parë, zëvendëskryeministri Hajredin Kuçi ka kërkuar nga kompanitë e sigurimeve që të merren me këtë çështje.
“Kompanitë e sigurimit më kanë kthyer një përgjigje, me anë të së cilës theksojnë se do të angazhohen në këtë drejtim”, tregon Kuçi, për ‘Zërin’, duke shtuar se kjo është e tëra që ka marrë si përgjigje nga ata.
Gazeta ka kontaktuar me Rrahim Pacollin, kryetar i Byrosë Kosovare të Sigurimit (BKS), i cili bëri të ditur se të mërkurën (sot), do të mblidhet asambleja e Byrosë, ku do të diskutojnë për këtë çështje.
“Tarifat janë vendosur si reciprocitet me Serbinë, madje sipas informatave që kam, Serbia është duke shqyrtuar që edhe më shumë t’i rrisë tarifat për qytetarët e Kosovës. Prandaj, nuk e di se sa mund të bëjmë në këtë drejtim, por megjithatë do të bisedojmë për t’i parë mundësitë”, tha Pacolli.
Ai tha se është vështirë që tarifat të ulen vetëm për shqiptarët e Luginës së Preshevës, e jo edhe për serbët, sepse nuk ka mundësi ndarjeje, duke lënë të kuptohet që ka shumë pak mundësi që për momentin të gjendet zgjidhja.
Në anën tjetër, zyrtarë nga Lugina e Preshevës, thonë se ky premtim i Qeverisë së Kosovës është vetëm një blof i radhës i tyre.
“Mendoj që është edhe një blof i Qeverisë së Kosovës, për uljen e tarifave kufitare. Ka disa muaj që ka premtuar, ndërsa nuk ka bërë asgjë. Kjo tregon se Qeveria e Kosovës është joserioze ndaj Luginës së Preshevës”, u shpreh për “Zërin” Belgzim Kamberi, kryetar i Këshillit të të Drejtave të njeriut në Preshevë.
“Qeveria e Kosovës po vazhdon diskriminimin ndaj qytetarëve të Luginës së Preshevës, njëjtë sikur që bën Qeveria e Serbisë”, u shpreh Kamberi.
Kurse Ragmi Mustafa, kryetar i Preshevës dhe lider i Partisë Demokratike Shqiptare, tha se shqiptarët që nga dhjetori i vitit të kaluar janë futur në një geto. Ai tregoi për diskriminimin tjetër që po iu bëhet atyre nga ana e Maqedonisë, ku autoritetet atje kanë nisur të mos lejojnë lëvizjen e shqiptarëve të Luginës.
“Jemi bllokuar nga Kosova, e tani edhe nga autoritetet e Maqedonisë, të cilët kanë nisur të pengojnë lëvizjen e shqiptarëve të Luginës, por vetëm të shqiptarëve, sepse serbët nuk i pengojnë të lëvizin”, tha Mustafa, duke shtuar se maqedonasit nuk japin arsye për këto sjellje të tyre.
“Shqiptarët në Luginë të Preshevës janë izoluar krejtësisht, njëherë me Kosovë e tani edhe me Maqedoninë. Kështu kemi mbetur në një pozicion të palakmueshëm, sikur në gjendje lufte”, shtoi Mustafa.
Megjithatë, ai vazhdon të besojë se autoritetet e Kosovës do të ulin tarifat kufitare, duke shpresuar që vonesat kanë të bëjnë me çështje procedurale.
Behxhet Shala, nga Këshilli për të Drejtat e Njeriut në Prishtinë, thotë se Qeveria e Kosovës e ka për obligim t’i heqë këto tarifa ose të paktën t’i ulë në minimum, meqë është e vetmja ndihmë që mundet dhe duhet ta bëjë për shqiptarët atje.
Ndryshe, kjo masë është duke u aplikuar vetëm për shqiptarët e Luginës së Preshevës,sepse serbët e Kosovës që kalojnë kufirin janë të privilegjuar nga autoritetet kosovare./Titulli.com/
Mund ti tregoni shoqërisë për këtë artikull!
