Lokale
Leoneta Abdyli hapi ekspozitën e saj të parë individuale në Bujanoc
Në Shtëpinë e Kulturës në Bujanoc të shtunën është hapur ekspozita e parë me piktura e Leoneta Abdylit, nga Bujanoci, studente e vitit të tretë të Fakultetit të Arteve, drejtimi pikturë në Prishtinë.
Ekspozita me 54 piktura të Leonetës ishte e hapur për dy ditë me radhë, pra deri të hënën, ndërsa publiku artdashës i Bujanocit ka mundur të kënaqet me veprat e saj të krijuara në katër cikle: pejsazhe, portrete, natyrë e qetë dhe cikli abstrakt, duke përdorur stile të kombinuara.
“Jam e kënaqur me pjesëmarrjen e njerëzve në hapjen e ekspozitës, por edhe me vizitën në përgjithësi. Gjithashtu jam e kënaqur që arrita që ekspozitën e parë individuale ta hap në Bujanoc, në vendlindjen time”, u shpreh për Titullin, Leoneta Abdyli.
Në hapje të ekspozitës morën pjesë dashamirë të shumtë të artit, profesorë, kolegë të Leonetës nga Kosova, si dhe mysafirë nga Presheva.
Kjo ishte ekspozita e parë individuale e piktores së re nga Bujanoci, kurse në ekspozita të përbashkëta ka marr pjesë bashkërisht me kolegët e saj nga fakulteti në disa organizime të këtilla në Prishtinë e Tiranë.
Leoneta Abdyli thotë se piktorët që i pëlqejnë janë Faton Kryeziu nga Kosova për shkak të stilit të tij dhe kombinimit të ngjyrave, dhe Pashk Pervathi nga Shqipëria për shkak të nuancave që i përdor në punimet e tij. /Titulli.com/
[caption id="attachment_82198" align="aligncenter" width="480"]
Piktorja -Leoneta Abdyli[/caption]
Mund ti tregoni shoqërisë për këtë artikull!
