Vështrime
Epshi për pushtet serb, i ndërsen liderët e Luginës deri në Tiranë
Liderët e Luginës së Preshevës, këtë javë, e kanë pasur të ngjeshur me vizita të shumta nga Beogradi, në Prishtinë e deri në Tiranë.
Shkruan: Kujtim Sadriu
Qëllimi i këtyre vizitave e ka një emërues të përbashkët, pjesëmarrja në zgjedhjet e parakohshme të Serbisë, më 16 mars, ose bojkotimi i tyre.
Liderët institucionalë dhe partiakë, gjatë takimeve në Beograd, në Prishtinë dhe Tiranë, nuk arritën një marrëveshje të përbashkët rreth zgjedhjeve parlamentare, ata ashtu si shkuan edhe u kthyen, të ndarë e të përçarë si mos më keq.
Partitë politike shqiptare, që i thanë “Jo” zgjedhjeve parlamentare serbe, duke ofruar “arsyet” përmes një komunikate për shtyp, pse nuk dalin në zgjedhje, duke përmendur varg e vi: diskriminimin shumëvjeçar të Beogradit ndaj tyre, ata nuk iu përmbajtën asaj që e thanë, e nënshkruan dhe e vulosun për opinion.
Jo më shumë se 24 orë nga publikimi i komunikatës për shtyp, ku partitë politike alarmonin për mos dalje në zgjedhje, në takimin e Tiranës, te diplomati shqiptar Bushati, deklaronin diçka tjetër nga ato që i ofron komunikata. Ata në Tiranë kërkonin hise te mandati i deputetit, duke kërkuar një pajtim partiakë nëse ata radhiten të parët në Listë, për ta lënë PVD, të dytën sipas radhës. Kështu që, pjesa më e madhe e bisedës u përqendrua rreth kompromisit për të zënë vendin e parë në Listën unike rreth zgjedhjeve, duke harruar se pak më parë kishin dalë me komunikatë kategorikisht kundër zgjedhjeve.
Çfarë paradoksi! Po të pranonte i pari I PVD-së, që të zbres një shkallë më poshtë në Listën për deputetë, partitë kundërshtare të zgjedhjeve do të kishin pranuar me gjithë qejf të marrin pjesë në zgjedhje. Me këtë shihet qartë dyfytyrësia e këtyre liderëve politikë, të cilët se kanë për zemër zgjedhjen e problemeve shqiptare në Luginë, por për ta siguruar ulësen në Parlamentin e Serbisë, për interesa partiake, personale e familjare.
Duke parë diplomati shqiptar se këtyre liderëve të Luginës, nuk u prêt “sakica në një vend”, i la të kthehen ashtu si në këngën popullore: “Shko e eja si Adem Peja!”
(Autori është kryetar i Këshillit lokal të Partisë Liberale të Çeda Jovanoviçit për Preshevë, kandidat i mundshëm për deputet nga radhët e kësaj partie)
Mund ti tregoni shoqërisë për këtë artikull!
