Gent Cakaj pas Medvegjës thotë se qeveria shqiptare financon librari në Uqin

Ministri në detyrë për Evropën dhe Punët e Jashtme, Gent Cakaj bëri me dije se Qeveria e Shqipërisë ka vendosur t'i japë mbështetjen e nevojshme financiare Këshillit Kombëtar të Shqiptarëve në Mal të Zi.

Sipas tij, kontributi në fjalë synon hapjen e librarisë me literaturë në gjuhën shqipe, në Ulqin, përcjellë Titulli.com.

Përmes një shënimi në faqen zyrtare “Facebook”, kryediplomati shqiptar theksoi se ky projekt ka rëndësi të veçantë në forcimin e trashëgimisë historike e kulturës së vyer të shqiptarëve në Mal të Zi. Ai theksoi se ky projekt do të vijojë në Tuz, Guci dhe Plavë.

Ministri në detyrë për Evropën dhe Punët e Jashtme, Gent Cakaj ditë më parë pat njoftuar se Qeveria e Shqipërisë  do ta financojë hapjen e zyrave të Këshillit Kombëtar Shqiptar në Medvegjë.

Sipas tij shqiptarët e Medvegjës, kanë nevojë të jashtëzakonshme për praninë e Këshillit dhe mbështetjen e Shqipërisë, veçanërisht në përballjen me çështjen e pasivizimit të adresave dhe para sfidës madhore për ruajtjen e gjuhës shqipe si gjuhë zyrtare./Titulli.com/