Bujanoc: Ecnin në hekurudhë, i shkel treni (Foto)
Dy meshkuj të moshës së mesme, për të cilët dyshohet se janë emigrant ilegal nga Lindja e Mesme, kanë pësuar aksident fatal-vdekjen, herët në mëngjesin e së dielës në afërsi të fshatit Osllarë, jo shumë larg stacionit hekurudhorë në Levosovë të Bujanocit, ka konfirmuar policia në Vranjë.
Siç ka deklaruar Goran Jovçiq nga zyra e zëdhënësit të Policisë në Vranjë, aksidenti ka ndodhë në orën 05:08 minuta kur treni ndërkombëtar i mallrave me numër 4570, në shpejtësi të madhe po vinte nga drejtimi i Shkupit dhe me këtë rast ka goditur dy emigrantët.
Siç i kanë thënë dëshmitarët portalit informativ Titulli, në vendin e aksidentit ishte një pamje e tmerrshme, ku nga forca e goditjes, trupat e viktimave ishin shpërndarë në shumë vende në hekurudhë.
Sipas deklaratës së drejtuesit të trenit dhënë organeve hetimore, viktimat dyshohet se po pushonin në shinat e trenit, dhe se ai ka tentuar që t’i paralajmërojë me anë të sirenës, por se emigrantët nuk kanë arrit të largohen nga traseja.
Hetimet në vendin e ngjarjes i ka kryer zëvendës prokurori i Gjykatës themelore të Vranjës dhe pjesëtarët e Policisë nga ky qytet.
Identifikimi i viktimave është duke vazhduar , megjithëse burimi ynë në polici thotë se tek viktimat nuk është gjetur asnjë dokument. Obduksioni i trupave të pajetë do të bëhet në Vranjë. /Titulli.com/
Foto nga stacioni hekurudhorë Levosovë dhe nga vendi i aksidentit:
