Sinani: Ka dështuar integrimi i shqiptarëve Luginës së Preshevës në institucionet e Serbisë (statistika)
Këshilltarja e kryeministrit Albin Kurti për Luginën e Preshevës, Ardita Sinani, e ka të quajtur projekt të dështuar planin për integrimin e shqiptarëve të kësaj zone në institucionet shtetërore.
Ajo ka shkruar në Facebook të dielën se asnjë iniciativë apo marrëveshje s’i ka dhënë as rezultatet minimale “në përmirësimin e pjesëmarrjes së shqiptarëve në institucionet shtetërore”.
Këshilltarja e Kurtit ka theksuar se përfaqësimi i shqiptarëve në institucionet serbe në Luginë të Preshevës ishte masë urgjente “në pajtim me strukturën proporcionale të popullsisë” në Preshevë, Medvegjë e Bujanoc.
“Megjithatë, nuk ka asnjë dyshim se jetësimi i këtij qëllimi në Luginën e Preshevës që në thelbin e tij “është më qenësori i procesit paqësor” është edhe më i dështuari. As Programi nga viti 2001, as Marrëveshja për Riorganizimin e Trupit Bashkërendues i vitit 2009, e as “Plani Shtatëpikësh” nuk dhanë as rezultatet minimale në përmirësimin e pjesëmarrjes së shqiptarëve në institucionet shtetërore të qarkut dhe republikane”, ka theksuar Sinani.
