PVD: Komuna e Preshevës për 3 javë afro 2000 euro shpenzime në restorane?
Partia pë Veprim Demokratik në Preshevë akuzon partinë në pushtet për shpenzim të parasë publike nga kryetari i komunës së Preshevës, Shqiprim Arifi.
Kumtesa e plotë e PVD-së:
U ankuan se PVD po e rrezikon Buxhetin e Preshevës, kur me 10 prill të këtij viti, për të mbuluar skandalin e shkaktuar nga drejtori i Shtëpisë së Shëndetit në Preshevë, APN u mundua të gjejë mënyra për krijimin e temave inekzistente, duke fabrikuar lajmin për kinse një borxh të shkaktuar nga PVD e të adresuar në komunë të Preshevës.
Për t'a bërë edhe më komike këtë situatë, me metod të mashtrimit politik u ankuan se komuna e Preshevës për shkak të këtij "borxhi" qesharak prej 5.000 dinarëve, rrezikon t'i bllokohen mjetet në buxhetin e komunës. Për këtë e akuzuan PVD-në.
Këta mashtrues politik dolën huq brenda më pak se 24 orëve, kur në Konferencën për media, kryetari i PVD-së Shaip Kamberi me argumente dëshmoi se ky borxh ishte i paguar nga PVD, dhe se në historinë e saj 29 vjeçare, ky subjekt obligimet e veta i ka kryer vet.
Kryetari Kamberi paralajmëroi udhëheqjen komunale të Preshevës se i janë lajmëruar shumë aktivistë të PVD, të cilët janë në gjendje që nga paratë e veta ta kryejnë këtë obligim vetëm që komunës së Preshevës mos t'i bllokohet buxheti i saj.
E vërteta po del se nëse diçka rrezikon ta bllokojë buxhetin komunal të Preshevës, ato janë harxhimet astronomike të kryetarit të komunës së Preshevës dhe udhëheqjes komunale të krijuara nga drekat e darkat luksoze.
Nga ekstrakti i marrë në shërbimin e administratës komunale, me kërkesën e këshilltarit të PVD-së Rinor Krasniqi,shohim se për 3 javë, vetëm në një restorant të Preshevës nga buxheti komunal janë harxhuar 196.740,oo dinarë apo gati 2.000 Euro.
Se a do të duhej t'i shkaktonte hall e kokëçarje kryetarit të komunës një borxh inekzistent prej 5.000 dinarëve apo borxhi real prej 196.470 dinarëve, le ta vlerësojnë tash ekspertët e sulmeve të fabrikuara, e të cilët janë jo pak në këtë udhëheqje komunale.
