Presidenti Thaçi: Hasan Prishtina nuk u pajtua me copëtimin e trojeve shqiptare

Duke përkujtuar atdhetarin dhe veprimtarin e çështjes kombëtare shqiptare, Hasan Prishtinën, presidenti i vendit, Hashim Thaçi ka filluar sot të publikoj në rubrikën e tij "Njerëz të Paharrushëm" në "Facebook".

Hasan Prishtina, ai tha se si atdhetar dhe diplomat nuk u pajtua me copëtimin e tokave shqiptare dhe ngriti zërin në Konferencën e Parisit dhe në Lidhjen e Kombeve, duke denoncuar krimet serbe në Kosovën e pushtuar.

“Ideologu i Lëvizjes Kombëtare që rezultoi me pavarësinë e Shqipërisë, dha kontribut të jashtëzakonshëm në ngritjen e kombit shqiptar në periudhën më të rëndësishme historike. Si deputet i parlamentit turk u angazhua për të drejtat politike dhe kombëtare. Si strateg ishte në krye të kryengritjeve të viteve 1908-1912”, ka thënë Thaçi.

Thaçi ka lartësuar figurën e Hasan Prishtinës duke përmendur përpjekjet e tij të pareshtura për çlirimin dhe bashkimin e Kosovës me Shqipërinë.

“Ai mbështeti financiarisht shkollimin e fëmijëve kosovarë në shkollat shqipe në Shqipëri. Për organizimin e kryengritjeve shkriu një pjesë të madhe të pasurisë. Hasan Prishtina ishte atdhetari më mendjendritur dhe zemërkulluar që prodhoi historia e kombit shqiptar. Jam krenar që Universiteti i Prishtinës mban emrin e këtij kolosi të historisë sonë”, përfundon ai.