Presheva me pakon ekonomike emergjente, mbesin jashtë familjet me asistencë sociale

Kuvendi i komunës së Preshevës gjate ditës së djeshme ka miratuar pakon emergjente ekonomike "Presheva 2020" me qëllim të daljes në ndihmë komunitetit lokal pas gjendjes së pandemisë COVID-19.

“Shuma e përgjithshme është 763.834 Euro nga të cilat 200 mijë euro ndihmë nga Qeveria e Republikës së Kosovës. "Presheva 2020"”, ka shkruar Shqiprim Arifi, kryetar  i komunës së Preshevës.

Ndërsa Iliri Sadriu, nënkryetar i PDSH-së partisë më të madhe opozitare në Preshevë vlerësoi se pako financiare shoqërohet me mjaft mangësi dhe vërejtje të cilat u dhanë edhe gjatë seancës së Kuvendit Komunal nga këshilltarët e Partisë Demokratike Shqiptare. 

“Në kuadër të pakos financiare nuk është përfshirë kategoria e familjeve me asistencë sociale, pastaj familjet që iu nënshtruan vetizolimit në periudhë 28 ditëshe si dhe asnjë ndihmë për familjet me të ardhura minimale mujore dhe personat mbi 65 vjeç e të cilët nuk kanë pensione”, tha Sadriu për Titulli.com. 

Sipas tij në sektorin e bizneseve lokale, të agronomisë, dhe pako për pensionistët poashtu ka mangësi sepse mungon kategorizimi i tyre sipas gjendjes që kanë.

“Sektori e shëndetësisë kryesisht i dedikohet personelit partiak të shumicës qeverisëse të pushtetit lokal dhe nuk ka asnjë efekt për të zbutur gjendjen e tyre”, u shpreh Sadriu. 

Pakoja ekonomike nga qeverisja lokale e Preshevës u cilësua si historike ndërsa opozita duke e kundërshtuar mënyrën e ndarjes vlerësuan se kjo ndihmes më shumë  i orientohet klientelës politike./Titulli.com/