Vështrime
Në “shtrat” me xhandarët!
Janë banorë të Kosovës, e kanë kryeministër Hashim Thaçin, por ata vizitohen më shpesh nga xhandarmeria serbe sesa nga pushtetarët e tyre. Jo vetëm që pa problem futen në territorin e Kosovës, por pa fije droje ua drejtojnë tytat e automatikut mbi kokat e banorëve të një shteti të brezit kufitar.
Shkruan: Lavdim Hamidi
Banorët e Karaçevës dhe tash të Muçibabës hyjnë në natë e dalin në dritë me frikën se kur do t’u vijnë xhandarët serbë “mysafirë”. Këtë hall të qindra banorëve të Kosovës tash 14 vjet pas lufte, nuk e ka Hashim Thaçi. Mjafton që ai të çojë përpara agjenda politike, t’u thotë amin kërkesave të Beogradit e të nënshkruajë çfarëdo që i kërkon Daçiq.
Ai nuk njeh shqetësimet e këtyre banorëve, nuk ka probleme me pagjumësi, bile po bëhet gati që të flejë edhe më rehat në vilën superluksoze prej 700 metra katrorë që po i ndërtohet në një nga lagjet më të shtrenjta të Prishtinës.
Atij i mjafton që të kujdeset vetëm për familjen e tij, të cilët ruhen nga pjesëtarë të shumtë të sigurimit dhe Policia e Kosovës, ndërsa forcat e xhandarmërisë serbe i sheh vetëm nëpërmjet ekranit të televizionit, apo nëpërmjet mjeteve tjera të informimit, kur ata hyjnë e dalin të armatosur dhe me motoçikleta në brendi të territorit të Kosovës. Edhe pse nuk i sheh “live” xhandarët e armatosur, Thaçi takohet shpesh në Bruksel me kryexhandarin e Serbisë, Ivica Daçiq, të veshur në petkun e politikanit.
Daçiq përpos që është kryeministër është edhe ministër i Brendshëm në Qeverinë e Serbisë, ku ka nën kontroll të plotë pjesëtarët e xhandarmërisë, të cilët po vazhdojnë t’ua shtinë frikën në palcë kosovarëve për më shumë se një dekadë që nga përfundimi i luftës në vend.
Kryeministri i Kosovës në takimet e shpeshta me homologun e tij serb në kryeqendrën e Evropës nuk e ka parë të arsyeshme që të diskutojë për terrorin që po përjetojnë banorët e Karaçevës dhe Muçibabës, apo edhe të fshatrave të Llapit, ku xhandarët e Daçiqit nuk po i kursejnë as pleqtë e as fëmijët.
Është rasti i fundit ku pjesëtarët e xhandarmërisë dhunuan 84-vjeçarin, Xhemajl Dauti, i cili kishte dalë për të prerë dru në mal, kur në gjoksin e tij u ndeshën për më shumë se gjysmë ore tytat e automatikëve.
Xhandarët e akuzonin Dautin se ka hyrë në territorin e Serbisë, ndonëse ai ishte i vetëdijshëm se mali i tij ndodhet hiç më pak se dy kilometra në brendi të territorit të Kosovës, ku policët serbë rrinin “këmbëkryq”.
Nuk është kjo hera e parë që xhandarët e Daçiqit kanë hyrë në këtë fshat dhe në fshatrat tjerë të Republikës së Kosovës. Banorët e Karaçevës të Komunës së Kamenicës kanë filluar të shpërngulen në qytete tjera të Kosovës, pasi që, sipas tyre, xhandarët serbë po ua marrin edhe bagëtitë nga ahuri.
Në fshatrat e brezit kufitar me Serbinë, të cilat edhe ashtu janë boshatisur, që nga paslufta nuk depërton përkujdesja shtetërore e Kosovës dhe në mungesë të kësaj depërtojnë xhandarët serbë të armatosur deri në dhëmbë.
Pas gjitha këtyre të zezave të xhandarëve serbë, kryeministri Thaçi po mburret se po i normalizon marrëdhëniet me Serbinë, derisa në gjoksin e qytetarëve të vet po qëndrojnë tytat e automatikëve.
Në fakt bisedat për normalizim të marrëdhënieve me Serbinë, po dëshmojnë se nuk po i zgjidhin problemet e shumta mes dy shteteve, por po e fuqizojnë vetëm pozicionin politik të Hashim Thaçit, e jo edhe shtetin e Kosovës, pasi që xhandarët serbë po hyjnë po dalin në territorin e vendit si në “bahçe të babës”. Dhe kështu Hashim Thaçi po tregon qartë se më të rëndësishme e ka ruajtjen e pushtetit, se sa shtetin e qytetarët.
Opinionet e autorëve janë perosonale dhe nuk paraqesin edhe opinionin e redaksisë së portalit të pavarur informativ Titulli.comcopy(/home/titulli/public_html/images/image/t/uploads/2013/03/xhandarmeria1.jpg): failed to open stream: No such file or directory
Mund ti tregoni shoqërisë për këtë artikull!
