Lutfiu: Serbia ndan mjete për nxënësit serbë në Luginë, diskriminon ata shqiptarë

Qeveria e Serbisë po diskriminon në kufi të racizmit nxënësit shqiptarë. Këtë e ka thënë kryetari i Këshillit Kombëtar Shqiptar në Luginën e Preshevës, Nevzad Lutfiu, përmes një postimi, ku ka treguar investimet që po i bën Serbia në shkollat me nxënës serbë, duke i përjashtuar nga ky proces ato me nxënës shqiptarë. 

“Me keqardhje të thellë, më duhet që në cilësinë e kryetarit të Këshillit Kombëtar Shqiptar të paraqes një listë të investimeve që Qeveria e Serbisë e ka bërë për shkollat në Luginën e Preshevës, e ku në fokus të investimeve janë vetëm shkollat ku mësojnë nxënësit serbë, kurse nga listat e investimeve janë përjashtuar tërësisht shkollat ku mësojnë nxënësit shqiptarë”, thuhet në reagimin e kryetarit të KKSH-së, Nevzad Lutfiu.

Ai ka paraqitur me shifra investimet që janë duke u bërë në shkollat ku mësojnë nxënësit serbë, e që janë si në vijim:

- Renovimi i shkollës fillore "Branko Radiqeviq", në Bujanoc, 233.887.773.36 dinarë, ose 1.98 milionë euro.

- Renovimi i sallës së sportit të shkollës "Branko Radiqeviq", në Bujanoc, 150.541.972.54 dinarë, ose 1.28 milionë euro.

- Ndërtimi i terrenit sportiv tek shkolla fillore "Vuk Karaxhiq" në fshatin Osllare, 2.696.891 dinarë, ose 22937 euro.

Ndërsa kërkesa e fundit për renovimin e shkollës fillore"Sami Frashëri" në fshatin Lluçan, sipas Lutfiut, është refuzuar.

“Ne nuk jemi kundër investimeve në shkollat ku mësojnë nxënësit serbë. Përkundrazi i gëzohemi mundësive më të mira për mësim-nxënie tek nxënësit e gjitha komuniteteve. Por, Këshilli Kombëtar Shqiptar mbetet tejet i shqetësuar me diskriminimin në kufi të racizmit që po ndodhë në një vend që synon integrime evropiane”, thuhet në reagimin e Lutfiut.